ئاوى نیشتمانى گەیشت بە دوو گەڕەکى بۆسکێن
دوو گەڕەک
بۆسکێن؛ کۆتایی بە سەردەمی تانکەر هات و ئاوی ماڵانیان پێدەگات
964+
وریا فەتاح
کێشەی دابینکردنی ئاوی خواردنەوە بۆ دوو گەڕەک لە شارەدێی بۆسکێنی سەر بە ئیدارەی ڕاپەڕین چارەسەر کرا و بۆ لەمەودوا زیاتر لە 150 ماڵ لە رێگەی تۆڕی نیشتمانییەوە ئاویان پێدەگات، لەکاتێکدا پێشتر بە تانکەر ئاویان بۆ دابین دەکرا.
بەڕێوەبەرایەتى ئاوى راپەڕین بڵاوى کردەوە، گەڕەکەکانی “نالیا” و “برایەتی” لە شارەدێی بۆسکێن، کە پێشتر پشتیان بە تانکەر دەبەست بۆ ئاوی خواردنەوە، ئێستا بوونەتە خاوەنی تۆڕی ئاوی سەربەخۆ.
پڕۆژەکە لەلایەن بەڕێوەبەرایەتی ئاوی راپەڕینەوە دیزاین و پێداویستییەکانی بۆ ئامادەکرابوو، دواتر لە رێگەی ئیدارەی سەربەخۆی راپەڕینەوە رەزامەندی دارایی بۆ وەرگیرا و خرایە بواری جێبەجێکردنەوە.
بەڕێوەبەرایەتی سەرچاوەکانی ئاوی راپەڕین مۆڵەتی هەڵکەندنی بیرێکی قوڵی بۆ پڕۆژەکە دەرکردووە، کە ئێستا بە سەرکەوتوویی کارەکانی تەواو بووە و ئاوی خواردنەوە بۆ ماڵەکانی هەردوو گەڕەک دابین دەکات.
وەک ئەوەى بەڕێوەبەرایەتییەکە روونى کردووەتەوە، بە تەواوبوونی ئەم پڕۆژەیە، نزیکەی 150 بۆ 200 خێزان لەم دوو گەڕەکە سوودمەند دەبن و ماڵئاوایی لە کڕینی ئاو بە تانکەر دەکەن.
بۆسکێن شارەدێیەکى سەر بە قەزاى رانیەیە لە ئیدارەى راپەڕین کە دەکەوێتە باکورى خۆرهەڵاتى رانیە و نزیکە لە دەریاچەى دوکانەوە.
