شارە حەیاتەكە ئارامە
“موشەکیش ببارێ ئێمە هەر نانی خۆمان ئەخۆین”
+964
ئەحمەد محەمەد _ سلێمانی
ژێر پردەكە، یەكێكە لەو شەقامانەی سلێمانی كە بە رۆژ و شەو جمەی دێت، خەڵكی شار و میوانانی ژەمە خواردنی شەوانیان دەبەنە ئەو شەقامە و شەڕ و ئاڵۆزییەكانی ناوچەكەش كاریگەری لەسەر سەردانیكارانی نەبووە.
هەرێمی قەل، كاسبكارێكی شەقامەكەیە و بە 964ی وت، شەوانە خەڵكی سەردانمان دەكەن و شەڕو ئاڵۆزییەكانی ناوچەكەش بازاڕی لاواز نەكردووین، تا كاتژمێر 3ی شەو دوكانمان كراوەیە و خواردنەكانمان هەمووی فرێشە، برنجی كوردیمان هەیە بە قەل و كەڵەشێر و قۆزیەوە و كەسیش گلەیی لە خواردنەكانمان نییە.
خەڵكی شارەكە كە بۆ خواردنی نانێكی شەوانە سەردانی ژێر پردەكەیان كردووە، قسەیان بۆ مایكی 964 كردووە و دەڵێن، شار ئارامە و شەڕی نێوان ئیسڕائیل و ئێران هیچ ترسێكی بۆ ئێمە نییە و شەوانە بە ئارامی بۆ نانخواردن سەردانی ژێر پردەكە دەكەین و نانێك دەخۆین و دەڕۆینەوە.
ئارام ئەرسەلان، بۆ نانخواردنی شەوان سەردانی ژێر پردەكەی كردووە و بە 964ی وت، ئەو شەڕەی كە هەیە هیچ پەیوەندی بە عێراقەوە نییە و جەوی خۆمان تێك نادەین، بارودۆخەكە هەرچۆنێك بێت شەوانە سەردانی ئێرە هەر دەكەین.
دەشڵێت، ئەگەر موشەك وەكو باران ببارێت بەسەرماندا، جەوی شەوانەی خۆمان هەر دەكەین و نانەكەمان هەر دەخۆین.
پێداچوونەوەی: پەری ساڵح
