“حکومەتی عێراق ئاستەنگى لە بەردەم هەناردەکردنی نەوتی هەرێم دروست کردووە”

964+

محەمەد فاتیح

وەزارەتی سامانە سروشتییەکانی هەرێمی كوردستان پێی وایە حكومەتی عێراق، بە بیانووی جۆراوجۆر رێگری لە هەناردەكردنەوەی نەوتی هەرێمی كوردستان بۆ دەرەوە دەكات، ئەو هەنگاوانەش بە نادەستووری و نایاسایی وەسف دەكات.

وەزارەتی سامانە سروشتییەکان بڵاویكردەوە، کەمال محەمەد ساڵح، وەزیری سامانە سروشتییەکان بە جیا پێشوازیی لە هەر یەک لە ئاتیلا تۆس، کونسوڵی گشتیی هەنگاریا و رافائێل مۆڤسێسیان، کۆنسولی گشتیی ئەرمینیا لە هەولێر کرد و لە هەردوو دیدارەکەدا، وەزیری سامانە سروشتییەکان؛ ئاستەنگ و بەربەستەکانی بەردەم هەناردەکردنەوەی نەوتی هەرێمی باس کرد.

ئەوەشی وتووە، “حکومەتی عێراقی فیدراڵ بەپێچەوانەی دەستوور و یاسا و تەنانەت بڕیاری دادگاکانی عێراق، ئاستەنگى لەبەردەم هەناردەکردنی نەوتی هەرێم دروست کردووە، لەکاتێکدا هیچ کێشەیەک لە گرێبەستەکانی نەوتی هەرێم لەگەڵ کۆمپانیاکاندا نییە، بەڵام حكومەتی عێراق ئاماده نییە ماف و گەرەنتی و تێچووی بەرهەمهێنانی نەوتی کۆمپانیاکان بدات”.

بەپێی راگەیاندراوەكەی وەزارەت، هەردوو کونسوڵى هەنگاریا و ئەرمینیا پشتگیری خۆیان و حکومەتەکانیان بۆ چارەسەرکردنی کێشەکانی نێوان هەرێم و حکومەتی ناوەندی پیشاندا.