لە ملەی نەڵمەی پێنجوێن
مینی پاسێک وەرگەڕا و سێ کەس برینداربوون
964+
کامیار کەمال- پێنجوێن
لە ملەی نەڵمەی پێنجوێن مینی پاسێک بە 14 نەفەرەوە وەرگەڕاو و تا ئێستا سێ کەس بە برینداری گەیەندراونەتە نەخۆشخانەی شەهید شەوکەت لە سەیدسادق.
هێمن ئیبراهیم قایمقامی پێنجوێن هەواڵەکەی بۆ 964 پشتراستکردەوە و رایگەیاند، بەهۆی نەمانی ئیستۆپەوە مینی پاسێک وەرگەڕاوە و 14 کەسی تێدابووە و سێ کەسیان رەوانەی نەخۆشخانە کراون.
وتیشی، تەنها ئەو سێ کەسە کەمێک هیلاک بوون و رووداوەکەیان لەسەر قورس بووە، بەڵام هیچ مەترسی لەسەر ژیانیان نییە و ئەوانی دیکەش تەندروستیان جێگیرە و نەچونەتە نەخۆشخانە.
باسی لەوەشکرد، ئەو کەسانە لە خورماڵەوە هاتبوونە پێنجوێن بۆ کرێکاری و کارکردن .
هاوکات، کەمال سەعدون کارگێڕی نەخۆشخانەی شەهید شەوکەت بە 964ـی راگەیاند، دوو ژن و پیاوێک گەیەندراونەتە نەخۆشخانەکەمان و تەندروستیان جێگیرە.
پێداچوونەوە: توانا نەقی
