دەستگیرا بەسەر سەدان تۆن کەلوپەل کە لە هەرێمەوە بۆ عێراق نێردرابوو

ژووری هەواڵ

لە بازگەکانی عێراق، دەستگیرا بەسەر سەدان تۆن خۆراک و کەلوپەلدا کە لە هەرێمی کوردستانەوە بار کرابوون بەرەو ناوچەکانی ناوەڕاست و خوارووی عێراق.

دەزگای ئاسایشی نیشتمانی عێراق رایگەیاند، هەوڵدراوە بە رێگەی قاچاغ سەدان تۆن خۆراک و کەلوپەل لە هەرێمی کوردستانەوە بگوازرێتەوە بۆ ناوچەکانی دیکەی عێراق، بەڵام رێگریان لێکردووە.

کەلوپەلەکان لەنێو 51 ئۆتۆمبێلدا بوون و ویستویانە لە رسوماتی گومرگی بازگەکانی کەرکوک و نەینەوا و دیالە دەربازیان بێت، بەڵام دەستیان بەسەردا گیراوە و سەرجەم شۆفێرەکانیشیان دەستگیر کراون.

“بەشێک لەو کەلوپەلانەی دەستیان بەسەردا گیراوە، بەڵگەنامەی ساختەیان هەبووە، هاوکات رێگەی قاچاخ بۆ تێپەڕاندنی بەرهەمەکان بەکارهێنراوە”، ئاسایشی نیشتمانی عێراق وا دەڵێت.

ئەو خۆراک و کەلوپەلانەی دەستیان بەسەردا گیراوە پێکهاتوون لە ئامێری ئەلیکترۆنی و کارەبایی، کەرەستەی جۆراوجۆری پزیشکی و بیناسازی، پەڕەی کانزا، پاککەرەوە، ئارد، و کەرەستەی تر.