ئاگرێکى گەورە لە سنوورى شەمامک
درا بە دادگا
“کەسێک هەزاران تۆن پاشماوەى ئاگر تێبەرداوە و ژینگەى هەولێرى پیس کردووە”
964+
وریا فەتاح
ژینگەى هەولێر خۆى ئەوەندە خاوێن نییە و گرفتارە بەدەست دووکەڵى چەندان پاڵاوگەى نایاسایى و مۆلیدە و ئۆتۆمبێل، کەچى کەسێک هەڵساوە بە کۆکردنەوەى سەدان هەزان تۆن پاشماوەى پلاستیکى و تایە و ئاگرى تێبەرداوە.
ئاگرەکە لە 15ـى ئەم مانگە لە گوندى یەدى قزلەرى سنوورى شەمامک بووە، فەرمانگەى ژینگەى هەولێر، بەدواداچوونى بۆ ئاگرەکە کردووە و دەرکەوت کەسێک هەزاران تۆن پاشماوەى کۆکردووەتەوە و ئاگرى داوە.
دڵشاد حوسێن هیرانى، بەڕێوەبەرى فەرمانگەى ژینگەى هەولێر بە 964ـى وت،” بەڵام کاتێک بەدواداچوونمان کرد، دەرکەوت هەزاران تۆن پاشماوە دەسوتێت و بووەتە هۆى دروستبوونى دوکەڵ و پیسبوونى ژینگە”.
وەک باسى دەکات، ئەو کەسە لە هەموو عێراقەوە بە سەدان هەزار تۆن پاشماوەى پلاستیک و تایە و ئاسنى کۆکردووەتەوە و لە جێگایەک دایناوە.
هەرچەندە لە بەدواداچوونەکان، خاوەنى ئەو پاشماوانە رەتى کردووەتەوە کە خۆى ئاگرى دابن، بەڵام وەک ئەوەى دڵشاد حوسێن هیرانى روونى دەکاتەوە، گومان دەکەن بۆ توانەوەى پلاستیک و باغەکان و دەرهێنانى ئاسن، ئەو کارەى کردبێت تا ئاسنەکە بفرۆشێت.
ئاشکراشى کرد، پێشتر چەند جارێک کەسەکەیان ئاگادار کردووەتەوە کە پاشماوەکان لاببات، بەڵام کەسەکە پابەند نەبووە.
فەرمانگەى ژینگە ئەو کەسەى داوە بە دادگا و نوسراویشى بۆ پارێزگاى هەولێر کردووە کە دەبێت ئەو کەسا پابەند بکرێت بە لابردنى ئەو پاشماوانە.
