بەهای دۆلار دابەزی و دینار و تمەنیش بەرزبوونەوە - وێنە: گرافیکی 964
"ئێران و ئەمریکا رێکنەکەون وەزعی عێراقیش تێکدەچێ"
دۆلار دابەزی و دینار و تمەنیش بەرزبوونەوە؛ دانوستانەکانی تاران و واشنتن چوونە قۆناغێکی نوێ
964+
شۆڕش قادری
دوای تەواوبوونی گەڕی سێیەمی دانوستانەکانی ئێران و ئەمریکا، بەهای دۆلار دابەزی و دینار و تمەنیش بەرزبووەنەوە، شارەزایەکی بازاڕی دراویش دەڵێت، ئەو دوو وڵاتە رێکنەکەون، بەهای دینار و تمەن بەو شێوەیە نامێنێتەوە و وەزعی عێراقیش تێکدەچێت.
ئەمڕۆ لە مەسقەتی پایتەختی عوممان گەڕی سێیەمی دانوستانەکانی ئێران و ئەمریکا بۆ چارەسەرکردنی ناکۆکییەکانیان بەڕێوەچوو، دوای کۆبوونەوەکەش عەباس عێراقچی تەنیا ئەوەی بە رۆژنامەنووسان وت کە، “کۆبوونەوەیەکی باش بوو و دەتوانم بڵێم ئاراستەی دانوستانەکان بەرەو پێشە و رێککەوتین، دانیشتنەکان بەردەوام بن و بچێتە قۆناغێکی نوێوە”.
کەیفی خۆشناو وتەبێژی بازاڕی دراوی هەولێر بە 964ـی وت، “بازاڕی دراو لە کوردستان چاوی بڕیوەتە ئەو دانوستانانە و ئەگەر ئەنجامی نەبێ، نەک باری ئابووری ئێران بەڵکو وەزعی عێراقیش تێکدەچێت”.
وتیشی، هەرچەندە ئەمڕۆ بازاری دراوی هەولێر بەفەرمی کراوە نەبوو، بەڵام هەر 100 دۆلاری ئەمریکی بە حەوت ملیۆن و 100 هەزار تمەن مامەڵەی پێوەکراوە بە نەخت و بە حەواڵەش بە نزیکەی هەشت ملیۆن و 200 هەزار تمەن بوو، بەرامبەر دیناریش، 100 دۆلار نزیکەی 144 هەزار و 600 دینار بوو.
بەپێی زانیارییەکانی 964، ئەمڕۆ لە بازاڕەکانی رۆژهەڵاتی کوردستان و ئێرانیش، 100 دۆلاری ئەمریکی بە نزیکەی هەشت ملیۆن و 100 هەزار تمەن مامەڵەی پێوەکراوە.
تمەن زیاتر بەرزدەبێتەوە؛ لە سێ رۆژدا 100 دۆلار نزیکەی سێ ملیۆن تمەن دابەزیوە
