وان و ئیستەنبوڵ
دووەم بوومەلەرزە لە توركیای دا
964+
ئەرسەلان عەبدوڵا
ئەمڕۆ چوارشەممە بوومەلەرزەی دووەم لە توركیای دا و هێزی ئەوەی دووەمیان، كە لە ئیستەنبوڵی داوە، 6.02 بووە.
ناوەندی ئەڵمانی بۆ توێژینەوە و زانستی زەوی GFZ، رایگەیاند، بوومەلەرزەیەك بە گوڕی 6.02 بە پلەی رێختەر لە شاری ئیستەنبوڵی توركیای داوە و قوڵاییەكەشی 10 كیلۆمەتر بووە لە ناوچەی سیلیڤری.
لە لایەكی دیكە ناوەندی بوومەلەرزەزانیی توركیا دەڵێت، پاشە لەرزەكان بەردەوامن.
میدیای توركیاش ڤیدیۆی هاوڵاتیانیان بڵاوكردەوە، كە لە ترسان هاتوونەتە سەر شەقامەكان و ترس و دڵەڕاوكێیان هەیە.
شایەدحاڵێک لە ناوخۆی ئیستەنبوڵ بە تۆڕی 964ی راگەیاند، بوومەلەرزەکە بەهێز بووە و دانیشتووان هەستیان بە لەرزینەكە كردووە، بەڵام دووپاتی کردەوە کە تا ئێستا هیچ زیانێکی گیانی یان داڕمانی باڵەخانەكان تۆمار نەكراوە.
سەرچاوەكە دەڵێت، زۆربەی دانیشتووان بیناکانیان جێهێشتووە و چوونەتە سەر شەقامەکان لە ترسی دووبارەبوونەوەی بوومەلەرە.
ئەمە لە كاتێكدایە ئەمڕۆ بەیانی زوو، بوومەلەرزەیەك بە گوڕی 4 پلە لە قەزای ئێلبەكی سەر بە شاری وانی باكووری كوردستانی دا، لە رۆژهەڵاتی توركیا.
