لە ماوەی یەک ساڵدا

413 هەزار تۆن کاڵا لە مەرزەکانی سنوورى سلێمانییەوە براوەتە سنە

20:15

964+

جۆین بە، چی روودەدات لێرەیە!

شۆڕش قادری

لە ماوەی یەک ساڵدا 413 هەزار تۆن کاڵا لە دەروازە سنوورییەکانی سلێمانییەوە براوەتە پارێزگای سنە لە رۆژهەڵاتی کوردستان و گومرگیان بۆ کراوە.

ئاژانسی هەواڵی ئیرنا لەزاری فەرامەرز ئومیدی چاودێری گومرگی پارێزگای سنە بڵاویکردووەتەوە، “لە 21.3.2024 تا 21.3.2025 ، 413 هەزار تۆن کاڵا بەبەهای 934 ملیۆن و 229 هەزار دۆلار لە دەروازە سنوورییەکانی سلێمانییەوە هاوردە کراوە و گومرگ کراون، رێژەکە بەراورد بە ساڵی پێشووتر 258٪ زیادیکردووە”.

ئاماژەی بەوەشکردووە، کاڵاکان جۆراوجۆرن و زۆربەیان لە وڵاتانی عێراق و ئیمارات و چین و ئیتاڵیا و تورکیاـوە هاوردە کراون.

گومرگی پارێزگای سنە دوو لقی سەرەکی لە دەروازەی نێودەوڵەتی باشماخ و مەرزی سەیرانبەن هەیە کە دەروازەی نێودەوڵەتی باشماخ، یەكێكە لە چوار مەرزە نێودەوڵەتییەكەی هەرێمی كوردستان و قەزای پێنجوێنی سەر بە پارێزگای سلێمانی بە شاری مەریوانی رۆژهەڵاتی كوردستان دەبەستێتەوە، نزیكەی شەش كیلۆمەتر لە پێنجوێنەوە دوورە و بە یەكێك لە دەروازە گرنگەكانی سەرچاوەی داهاتی هەرێم دادەنرێت، مەرزی سەیرانبەنیش یەکێکە لە مەرزە نافەرمییەکانی هەرێم و لە نێوان پێنجوێن و شاری بانەی سەربە پارێزگای سنەـدایە.