سێ راوچی سنووری پارێزگای سلێمانی دەستگیر کران

964+

شۆڕش قادری

راوچییەکان بە رەمەزانیش واز لە ئاژەڵ و باڵندە کێوییەکان ناهێنن و لە سەرەتای مانگی رەمەزانەوە 11 راوچی لە سنووری سلێمانی دەستگیر کراون، کە سێیانیان ئەمڕۆ قۆڵبەست کراون.

هێمن کەمەرخان وتەبێژی پۆلیسی دارستان و ژینگەی سلێمانی بە 964ـی وت، “مەفرەزەکانمان بەردەوامن لە دەرچوون و کێوماڵی سنوورەکانیان و هەر لەو چوارچێوەیەدا، ئەمڕۆ هەینی 14.3.2025 لە ئەنجامی دەرچوونی مەفرەزەیەکی بنکەی پۆلیسی دارستان و ژینگەی تەکیە بۆ سنوری شاخی کانی چنار، توانیویانە سێ کەس دەستگیر بکەن کە بەمەبەستی راوکردن چووبوونە سنورەکە” .

باسی لەوەش کرد، لەگەڵ دەستگیرکردنی ئەو سێ راوچییە، ئۆتۆمبێلێک، دوو کەوی زیندوو و چوار دەستە داو دەستیان بەسەرداگیراوە، پەڕاوی لێکۆڵینەوەیان بۆ کراوەتەوە و بۆ وەرگرتنی رێکاری یاسایی رادەستی دادوەری لێکۆڵینەوە کراوە.

بە قسەی هێمن کەمەرخان، لە سەرەتای مانگی رەمەزانەوە تا ئەمڕۆ 11 راوچی لە سنووری پارێزگای سلێمانی دەستگیر کراون و رووبەڕووی یاسا کراونەتەوە.

لە سلێمانی پۆلیس 3 راوچی دەستگیرکرد

ئەمڕۆ لە پارێزگای سلێمانی حەوت راوچی و دار بڕ دراونەتە دادگا