لیژنەکانى چاودێرى بازرگانى سلێمانى پشکنین بۆ خواردەمەنییەک دەکەن
دوکانداران ئاگاداربن
لیژنەکان چاوێکیان کردووە بە چوار چاو
964+
وریا فەتاح
بەدرێژاى رەمەزان دوکانداران پێویستە ئاگاداربن، لیژنەکانى چاودێرى بازرگانى سلێمانى چاوێکیان کردووە بە چوار چاو و شەش لیژنە لە کاتى جیاوازدا، بەسەر دووکان و شوێنەکاندا دەدەن و هەرچى خۆراک و کەلوپەلى خراپبوو بفرۆشێت، سزاى دەدەن.
بەڕێوەبەرایەتى چاودێری بازرگانی سلێمانی بڵاوى کردەوە، لە رێی لیژنەکانیانەوە بەوردی چاودێری بازار و شوێنە گشتییەکان دەکەن و لەماوەی دوو رۆژی رابردوودا 18 وەسڵی نایاساییان بۆ دووکان و شوێنەکان کردووە و دەستیش بەسەر چەندین ماددەی خۆراکیدا گیراوە.
بە وتەى بڵند ئەحمەد محەمەد، بەڕێوەبەری چاودێری بازرگانی سلێمانی، لە رۆژانی مانگی رەمەزان شەش لیژنە بە کاتی جیاواز سەردانی بازار و شوێنە گشتییەکان دەکەن، ئەمەش جگە لەوەی لیژنەیەکیان لەگەڵ لیژنەکانی قائیمقامیەتی سلێمانی دەردەچن و بەوردی چاودێری نرخ و کوالیتی ئەو شمەک و کاڵایانە دەکات کە لە بازار و شوێنە گشتییەکان دەفرۆشرێن.
ئاماژەی بۆ ئەوەشکرد، لەماوەی ئەم دوو رۆژەی مانگی رەمەزن 18 وەسڵی نایاسایی کراوە هەروەها دەستیش بەسەر چەندین ماددەی خۆراکیدا گیراوە، و تا کۆتایى مانگى رەمەزانیش بەردەوام دەبن لە چاودێرى بازاڕ و هەر دوکان و شوێنێک شتى خراپبوو و بێ کوالێتى بفرۆشێت، سزاى دەدەن.
