964 بەدواداچوون دەکات
دووسایدەکەی کەلار – دەربەندیخان چی بەسەرهات؟
964+
شۆڕش قادری
بەپێی بەدواداچوونێکی 964 قیرکردن و کارە قورسەکانی دووسایدەکەی کەلار – دەربەندیخان تەواو بووە و بەقسەی بەرپرسانی سنوورەکە، تەنیا هێڵکاری ماوە، بەڵام هێشتا دیار نییە، کەی دەکرێتەوە.
هەرچەندە بڕیار بوو لە سەری ساڵی تازەدا پڕۆژەی دووسایدکردنی رێگای کەلار – دەربەندیخان بکرێتەوە، بەڵام ساڵ کۆن بوو و ئەوا نزیکەی دوو مانگیش تێپەڕی، هێشتا رێگاکە بەفەرمی نەکراوەتەوە.
سەبارەت بەو بابەتە 964 پەیوەندی کرد بە چۆمان ئەحمەد وتەبێژی ئیدارەی گەرمیان، ئەو وتی، “قیرکردن و سەرجەم کارەکانی پڕۆژەکە تەواو بووە و تەنیا هێڵکاری رێگاکە ماوە، بەڵام ئاگادار نیم کەی رێگاکە بەڕووی هاوڵاتیاندا دەکرێتەوە”.
پڕۆژەکە یەکێکە لە پڕۆژە ستراتیژییەکانی وەزارەتی ئاوەدانکردنەوە و نیشتەجێکردن و درێژییەکەی 41 کیلۆمەترە، بە تەواوبوونی، رێگای کاتژمێرێک و 25 خولەکی نێوان ئەو دوو شارە، دەبێتە 40 خولەک و ئێستاش بەشێک لە قۆناغە تەواوبووەکانی رێگاکە خراوەتە خزمەتی ھاوڵاتیانەوە.
لە نێو پڕۆژەکەدا 35 پردی تێدایە، کە درێژییەکانیان بە چوون و هاتن دەگاتە پێنج کیلۆمەترو زۆرینەیان تەواو کراون، ھاوکات پردی ئاوە خێری کە گەورەترین پردە لەسەر ئاستی ھەرێمی کوردستان دەکەوێتە نێو پڕۆژەکەوە.
رێگای کەلار – دەربەندیخان یەکێکە لە رێگا مەترسیدارەکانی هەرێمی کوردستان و بەردەوام رووداوی هاتوچۆ و کارەساتی لێدەکەوەێتەوە، هەر بەو هۆیەشەوە رێگاکە لە ناو هاوڵاتیان بە رێگای مەرگ ناسراوە، بە کردنەوەی رێگاکە هیوایەک هەیە کە ئەو نازناوەی لێ بسێنرێتەوە و ببێت بە رێگای سەلامەت.
تا سەری ساڵ رێگای کەلار - دەربەندیخان تەواو دەبێت
