مەرزی کێلێ. وێنە :964
لە دیوى ئێرانەوە
بەهۆى بەفربارینەوە لە مەرزى کێلێ ئاستەنگى هاتوچۆ دروستبووە
964+
وریا فەتاح
بەهۆى بارینى بەفرێکى زۆرەوە، لە دیوى رۆژهەڵاتى کوردستانى مەرزى کێلێ ئاستەنگى هاتوچۆ دروستبووە.
عەباس عەزیز، بەڕێوەبەرى گومرگى راپەڕین بە 964ـى وت،”سەرەڕاى بارینى بەفر، بەڵام تیمەکان لەوێن و بەردەوام رێگاى مەرزى کێلێ پاک دەکەنەوە و لە دیوى باشوورى کوردستان هیچ گرفتێک نییە و هاتوچۆ ئاسایییە”.
روونیشى کردەوە، لە دیوى ئێرانەوە رێگاى مەرزەکە پاک نەکراوەتەوە و کێشەى هاتوچۆى دروستکردووە.
وەک باسى دەکات، زۆر جار دیوى ئێران و رۆژهەڵاتى کوردستانى مەرزى کێلێ دواى ماوەیەک رێگاکە پاکدەکەنەوە، ئەوەش دەبێتە هۆى دروستبوونى گرفتى هاتوچۆ لە مەرزەکەوە.
مەرزى کێلێ، مەرزێکى نافەرمییە لە نێوان هەرێمى کوردستان و وڵاتى ئێران، بە دیاریکراوى لە دیوى هەرێمى کوردستان دەکەوێتە سنوورى قەزاى پشدەر و لە دیوى رۆژهەڵاتى کوردستانیشەوە نزیکترین شار لێیەوە سەردەشتە.
بەقسەی عەباس عەزیز، لە ئێستادا رۆژانە 150 بۆ 250 بارهەڵگر لە مەرزى کێلێوە هاتوچۆ دەکەن و 800 بۆ 1000 کەسیش لە نێوان هەرێم و رۆژهەڵاتی کوردستان، دێن و دەچن.
