تۆمەتباری کوشتنی مامۆستایەک لە چەمچەماڵ - وێنە: دەزگای ئاسایشی هەرێم
"پێنج ساڵ حوکم دراوە بە ماددەی تیرۆر"
بکوژی مامۆستاکەی چەمچەماڵ دەستگیرکرا
964+
شۆڕش قادری
دەزگای ئاسایشی هەرێم دەستگیرکردنی بکوژی مامۆستاکەی ئەمڕۆی چەمچەماڵی راگەیاند، کە پێشینەی تاوانی هەیە و پێنج ساڵ حکوم دراوە بە ماددەی تیرۆر.
عەقید سەلام عەبدولخالق بەرپرسی راگەیاندنی دەزگای ئاسایشی هەرێم – سلێمانی، بە 964ـی وت، “لە میانی بەدواداچون و گەڕان بەدوای تۆمەتباری سەرەکی و کۆکردنەوەی زانیاری و چڕکردنەوەی هەوڵەکان بۆ دۆزینەوەی بکوژی مامۆستا (ل.ا.ح)، سەرجەم رێکارە پێویستەکان گیرانەبەر و توانرا لەلایەن ب.ئاسایشی بازگەکان تاوانبار (ه.ح.س) دەستگیر بکرێت و رووبەڕووی یاسا بکرێتەوە”.
“دوای کەمتر لە هەشت کاتژمێر لە رووداوەکە توانیمان تۆمەتبارەکە دەستگیر بکەین”، سەلام عەبدولخالق وای وت.
ئاماژەی بەوەش کرد، لەئەنجامی لێکۆڵینەوەی سەرەتایی، تۆمەتبار دانی بەتاوانەکەیدا ناوە و لێکۆلینەوە بەردەوامە بۆ گەیشتن بە هۆکاری ئەنجامدانی تاوانەکە.
بەرپرسی راگەیاندنی دەزگای ئاسایشی هەرێم وتیشی، تۆمەتبار پێشینەی تاوانی هەیە و ماوەی پێنج ساڵ حوکم دراوە بە ماددەی تیرۆر لەسەر بیری توندڕەوی و چووەتە ناو گرووپی داعش و کارکردن لەگەڵیاندا.
ئەمڕۆ دووشەممە 3.2.2025 لە چەمچەماڵ ژنێکی تەمەن 33 ساڵ بەرچەقۆ درا و پێش گەیشتنی بە نەخۆشخانەی فریاکەوتنی چەمچەماڵ، گیانی لەدەستدا.
