لەلای خوێنەرانی سلێمانی
خاکی زیکۆلا و دەروونناسی تاریک یەکەمینن
964+
دیلان محەمەد – سلێمانی
خاکی زیکۆلا کە لەلایەن نووسەری میسری عەمرعەبدولحەمیدەوە نووسراوە و لە ساڵی 2010 چاپی یەکەمی بڵاوکراوەتەوە، رۆمانەکە لە پلەی دووەمی خشتەی پەرتووکە پڕفرۆشەکانی ساڵی 2016 بۆ پەرتووکفرۆشی کیتابیکۆ و عەسیر ئەلکووتووب دوای خاکی خودا پلەی دووەمی بەدەستھێنا و هەتا ئێستاش لە کوردستان یەکێکە لەو کتێبانەی خواستێکی زۆری لەسەرە و خوێنەران هەڵیدەبژێرن.
کتێبی دەروونناسی تاریک کە لە نووسینی جۆناتان مایندە سێ پەرتووکە لە بەرگێکدا، دەروونناسی تاریک، رامکردنی بیر و هۆش، قایلکردن لە دەرونناسی تاریکدا، پڕۆگرامی زمانەوانی دەماریی، کتێبەکە رێنمایی یەکلاکەرەوە دەبەخشێت بۆ ناسینەوە و پاراستنی خود لە رازی دەرونناسی تاریکدا.
پەیامنێری 964 چووە بەر دەرکی سەرا و پرسیاری لە چەند کتێبفرۆشێکی ناوچەکە کرد سەبارەت بە پڕفرۆشترین کتێبەکانی ئەم ماوەیە.
خاکی زیکۆلا، ماوەی 10 ساڵە چوارجار چاپکراوەتەوە و هێشتا پڕفرۆشترینە
شاهین مەحمود لە کتێبخانەی گۆڵدن بوک وتی، پڕ فرۆشترین کتێبی ئەم هەفتەی رابردوو، کتێبی خاکی زیکۆلایە کە تا ئێستا چوار جار چاپکراوەتەوە و باس لە کوڕێک دەکات، کە دەچێتە سەر زەمینێک هەر شتێک بتەوێت بیکڕیت بە زیرەکی دەکڕدرێت بە پارە ناکڕدرێت.
دەرووناسی تاریک، پێویستە بۆ کۆمەڵگەی کوردی
کتێبی دووەم دەرونناسی تاریکە باس لە شێوازی چۆنیەتی مامەڵە لەگەڵ کەسی بەرامبەردا دەکات و پێویستە بۆ کۆمەڵگەی کوردی، کتێبی سێیەم یاساکانی چارتینە و باس لە سەر زەمینێک دەکات هەر کەسێک بگاتە تەمەنی 50 ساڵی دەبێت بمرێت.
جەزا محەمەد، کتێب فرۆشێکی دیکەیە لە بەردەرکی سەرا، لای ئەویش پڕفرۆشترین کتێبی ئەم ماوەیە، کتێبی دەرونناسی تاریک بووە و کتێبەکانی چیرۆکی منداڵان بە زمانی ئینگلیزی خواستێکی زۆریان لەسەرە، دۆگ مان و ئیمپیکیت بۆ گەوران، کتێبی ئینگلیزی نەخۆشی بێ دەنگ و پاوەر و مەندێست و گێت سمارت بەشێکی دیکەن لە پڕفرۆشترینەکان.
کتێبەکانی موئەدە پور لە فارسیەوە وەرگێڕدراون رۆمانن هەر یەکە لە یەڵدا و یاسەمین و شیرین و رۆکسانا، رۆمانەکانی گەیشتن بە عومەر و فاتیمە و خەدیخە کەسایەتی ئەو کەسایەتیانە باس دەکات، ئەوانەش بەشێکی دیکەن لە پڕ فرۆشترین کتێبەکانی هەفتەی رابردوو.
پێداچوونەوە: ژێوار خدر