دیاردەی سیحر و جادوو لە خورماتوو رووی لەزیادبوون کردووە

سیروان خورشید – دوزخورماتوو

دیاردەی سیحرو جادوو لە قەزای خورماتوو روویلە زیادبون کردووە، بەجۆرێک رۆژانە چەندین نوشتەو جادوو لەناو گۆڕستانی و هەندێ شوێنی تری قەزاکە دەدۆزرێتەوە، مامۆستایەکى ئاینیش باس لەوە دەکات، هەر کەس بیکات لە دین دەردەچێت.

داود کەریم، پێش نوێژ و وتارخوێنی مزگەوتی ئیمامی شافعى لە قەزاى خورماتوو بە 964ـى وت،”سیحر و جادوو بەجۆرێک تەشەنەی سەندووە تەنانەت لەناو شوێنی مردوو شۆری مزگەوتەکان و گۆڕستانەکان دەشاردرێتەوە و کاریگەرى ترسناکى بۆسەر خێزانەکان دروستکردووە و بووەتە هۆى لەبەریەکهەڵوەشاندنەوەى خێزان”.

باسى لەوەشکرد، رۆژانە چەندێن خێزان سەردانیان دەکەن کە سیحر و جادوویان لێکراوەو بەجۆرێک کارگەشتوەتە جیابونەوەی هاوسەران و دروستکردنى دۆخێکى دەروونى ناجێگیر بۆ خێزانەکان.

وەک ئەو مامۆستا ئاینییە باسى دەکات، نەک لە قەبرەستان و مزگەوتەکان، تەنانەت لە پڕۆژەى ئاوى قەزاکەش نوشتەیان دۆزیوەتەوە.

“لەڕووى ئاینییەوە هەرکەسێک جادوو و سیحر بکات، لە ئیسلام وەردەگەڕێ”، ئەو مامۆستا ئاینییە واى وت.

پێداچوونەوە: وریا فەتاح