هەناردەکردنی فافۆن و قوڕقوشم و پاتری شکاو راگیرا

+964

کامیار کەمال – پێنجوێن

هەناردەکردنی فافۆن و قوڕقۆشم و پاتری شکاو لە مەرزەکانی هەرێمی کوردستان راگیراوە و لە پێناو ئەوەی بەکاربهێندرێتەوە لە وەبەرهێنانی پاتری لە ناوخۆی کوردستان.

شاخەوان بەکر بەڕێوەبەری گومرکی باشماخ بە 964ـی راگەیاند، بڕیارەکە لە ئەنجومەنی وەزیرانەوە دەرچووە و بۆ هەموو مەرزەکانی هەرێمی کوردستانە و لە رۆژی 12.1.2025ەوە جێەجێ دەکرێت.

وتیشی، لە هەمان کات رەسمی پاراستنی بەرهەمی ناوخۆ بۆ پاتری ئۆتۆمبێل بە رێژەی لە %30 زیادکراوە و واتا بۆ هەر تۆنێک باتری هاوردەکراو لە دەرەوەی هەرێمی کوردستان ئەگەر پێشتر 100دۆلار وەرگیرابێت ئەوا لەمەودوا 130دۆلار وەردەگیرێت.

باسی لەوەشکرد، بڕیاری راگرتنی قوڕقۆشم و پاتری شکاو و فافۆن بۆ ئەوەیە جارێکی دیکە ریسایکل بکرێتەوە و لە وەبەرهێنانی پاتری لە هەرێمی کوردستان و لە کارگەی تایبەت بە دروستکردنی پاتری ئۆتۆمبێل لە پارێزگای سلێمانی بەکارئەهێندرێتەوە.

پێشتر پاتری شکاو و فافۆن و قوڕقوشم بە زۆری دەنێردرایەوە ئێران و لەوێ بە کارگەکانی ریسایکلین دەفرۆشرایەوە.

پێداچوونەوە: توانا نەقی

تا ئێستا جێگایەک نییە پیلە کۆکراوەکانی پێنجوێنی لێ ریسایكل بكرێت