بەهۆی خراپی کەشوهەواوە
نزیکەی 100 ئۆتۆمبێل لە کازاخستان بەیەکیاندادا
964+
ژێوار خدر
بەهۆی نالەباری کەشوهەواوە لە ناوچەی ئاکمۆلای وڵاتی کازاخستان زیاتر لە 95 ئۆتۆمبێل پێکیاندادا و زیانەکان نەزانراون.
بەپێی ئاژانسی هەواڵی کازینفۆرم، نزیکەی 100 ئۆتۆمبێل لە کازاخستان لەسەر رێگەی ئاستانە – شوچوچینسک لە ناوچەی ئاکمۆلا تووشی رووداوی هاتوچۆ بوون.
پۆلیسی ناوچەکەش دەڵێت، رووداوەکە لە دەوروبەری کاتژمێر 1:30 خولەکی پاشنیوەڕۆی ئەمڕۆ هەینی 3.1.2025، لە ناوچەی ئاکمۆلا روویداوە.
هۆکاری پێکدادانی ئۆتۆمبێلەکان بۆ نالەباری کەشوهەوا و بەفر و کڕیوەی زۆر دەگەڕێتەوە و تا ئێستا هیچ زانیارییەک لەسەر ژمارەی بریندارەکان و زیانەکان بەردەست نییە، پۆلیس رایگەیاندووە، کە کارمەندانی فریاکەوتن لە شوێنی رووداوەکەن بۆ رزگار کردنی زیان لێکەوتووان و گواستنەوەیان.
تیمەکانی فریاگوزاری ئەو وڵاتەش هۆشدارییان لە بارەی خراپی رەوشی کەشوهەواوە داوە و پێشنیارییان بۆ شۆفێرانی وڵاتەکە کردووە تا دەتوانن خۆیان لە گەشتکردن و بەکارهێنانی رێگەکان بپارێزن.
