زریان و گەردەلول هەزاران گەشتى دواخست
سەرى ساڵە و ئەمەریکا بۆى نایەت
964+
وریا فەتاح
گەردەلولێکى بەهێز، باشوورى رۆژهەڵاتى ئەمەریکاى گرتووەتەوە و بەهۆیەوە دوو کەس گیانیان لەدەست داوە و هەزاران گەشتى ئاسمانى و زەمینیش هەڵوەشاونەتەوە.
دەزگاى کەشوهەواى نیشتمانى ئەمەریکى بڵاوى کردەوە، دوێنێ لانیکەم 10 گەردەلوول لە ویلایەتى تەکساس و لویزیانا و میسیسیپى و رۆژهەڵاتى ئەمەریکاى گرتووەتەوە کە بووەتە هۆى گیانلەدەستدانى دوو کەس و بریندار بوونى شەش کەس.
ئارۆن گلیسۆن، پسپۆڕی کەشناسی لە سەنتەری پێشبینیکردنی زریانەکانی خزمەتگوزاری کەشوهەوای نیشتمانی رایگەیاندووە، پێدەچێت ژمارەى گیانلەدەستدان و رووداوەکان بەرز ببنەوە”.
زریانەکان کاریگەرى تەواویان جێهێشتووە و هەزاران گەشتى جەژنیان لە سەرەنسەرى وڵاتدا دواخستووە یان هەڵوەشاندووەتەوە.
ماڵپەڕی بەدواداچوونی گەشتەکانی FlightAware بڵاویکردەوە، لە رۆژی شەممەدا زیاتر لە 7000 گەشتی ئاسمانی لە ئەمریکا دواکەوتوون و زیاتر لە 200 گەشتی دیکەش هەڵوەشاونەتەوە.
سایتەکە ئاماژەی بەوەشکردووە، نزیکەی یەک لەسەر سێی گەشتەکان لە فڕۆکەخانەی نێودەوڵەتی هارتسفیڵد-جاکسۆن لە ئەتلەنتا دواکەوتوون و نزیکەی نیوەی گەشتەکانیش کە لە فڕۆکەخانەی نێودەوڵەتی دالاس/فۆرت وۆرس و فڕۆکەخانەی ئینتەرکۆنتینێنتاڵ، دواکەوتوون.
هەروەها گەردەلوولەکان زیانیان بە زۆرێک لە ماڵ و قوتابخانەکان گەیاندووە، جگە لە شکاندنی دارەکان و کەوتنەخوارەوەی ستوونەکانی کارەبا، ئەوەش بە وتەی بەرپرسانی ناوچەکە.
ئەو زریان و دۆخە نالەبارە سروشتییە لە کاتێکدایە، بەرەو بۆنەکانى سەرى ساڵى 2025 دەڕۆین و لە رۆژانى رابردووش هەڵەیەکى تەکنیکى گەشتەکانى هێڵى فڕۆکەوانى ئەمەریکاى راگرت و بە هەزاران گەشت دواکەوتن.
