دیمهنێكی پیسبوونى ژینگه‌ى هه‌ولێر كه دهستهى پاراستنى ژینگه بڵاویكردووهتهوه.
ئاماری فه‌رمى
له ماوه‌ى مانگێكدا زیاتر له 1239 تۆن خۆڵ به‌سه‌ر هه‌ولێردا باریوه
964+
فه‌رهاد حه‌سه‌ن
به‌پێی ئامارێكی فه‌رمانگه‌ى ژینگه‌ى هه‌ولێر، له ماوه‌ى یه‌ك مانگدا له سنوورى پارێزگاكه، زیاتر له 1239 تۆن خۆڵ به‌سه‌ر هه‌ولێردا باریوه و ئه‌م خۆڵبارینه‌ش زیاتر له 153 هه‌زار دۆنم رووبه‌رى زه‌وى گرتووه‌ته‌وه.
ئاماره‌كه‌ى ئه‌م فه‌رمانگه‌یه كۆكراوه‌ى خۆڵبارینى مانگى تشرینی یه‌كه‌مى ئه‌مساڵه له هه‌ر چوار بنكه‌ى سه‌نته‌رى هه‌ولێر، كۆیه، پیرمام و هه‌ریر.
زۆرترین خۆڵبارین له سه‌نته‌رى پارێزگا بووه كه یه‌ك ملیۆن و 110 هه‌زار و 700 كیلۆگرام به رێژه‌ى 2.9 ملیگرام خۆڵ له‌سه‌ر رووبه‌رى 383 ملیۆن مه‌تر دووجا باریوه.
كه‌مترین رێژه‌ى خۆڵبارین له قه‌زاى هه‌ریر بووه كه بریتی بووه له حه‌وت هه‌زار و 560 كیلۆگرام به رێژه‌ى 1.08 ملیگرام له‌سه‌ر رووبه‌رى حه‌وت ملیۆن مه‌تر دووجا باریوه.
له قه‌زاى كۆیه‌ش 112 هه‌زار كیلۆگرام به رێژه‌ى 4.48 ملیگرام له‌سه‌ر رووبه‌رى 25 ملیۆن مه‌تر دووجا و له پیرمامیش هه‌شت هه‌زار و800 كیلۆگرام به‌رێژه‌ى 0.88 ملیگرام له‌سه‌ر رووبه‌رى یه‌ك ملیۆن مه‌تر دووجا باریوه.
