ئەمڕۆ ژوورە بازرگانییەكانی كوردستان و عێراق كۆدەبنەوە

964+

ئەرسەلان عەبدوڵا

بڕیارە ئەمڕۆ شەممە لە بەغدا، ژوورە بارزگانییەكانی هەرێمی كوردستان و عێراق كۆببنەوە، بە ئامانجی چارەسەركردنی كێشەی رێگریكردن لە كارگەكانی كوردستان، كە رێگەنادرێت بەرهەمەكانیان بگەیەننە بازاڕەكانی ناوەڕاست و باشووری عێراق.

گەیلان حاجی سەعید سەرۆکی ژووری بازرگانی و پیشەسازیی هەولێر، ئەمڕۆ شەممە 7.12.2024 لە لێدوانێكی تایبەتدا بە 964ی راگەیاند، ئەمڕۆ وەك ژووری بازرگانی و پیشەسازیی هەولێر، لەگەڵ سەرۆكی ژوورە بازرگانییەكانی سلێمانی، دهۆك و هەڵەبجە و شاندێك لە هەرێمی كوردستان، لە بەغدا كۆبوونەوەیان لەگەڵ یەكێتیی ژوورە بازرگانی و پیشەسازییەكانی عێراق دەبێت و گفتوگۆ لە بارەی چەند بابەتێكی پەیوەست بە بازرگانی دەكەن.

وتیشی، یەكێك لە بابەتەكانی گفتوگۆیەكانمان، چارەسەركردنی پرسی رێگریكردنە لە كۆمپانیا و كارگەكانی كوردستان، كە رێگەیان پێنادرێت بەرهەم و كاڵاكانیان ببەنە بازاڕەكانی ناوەڕاست و باشووری عێراق.

“هەوڵدەدەین بگەینە ئەو چارەسەرەی كارگەكانی كوردستان تەنیا لە هەرێمی كوردستان خۆیان تۆمار بكەن و لە بەغدا تۆماری نەكەن، هەروەها ئەو كارگانەی تا ئێستا خۆیان تۆمار نەكردووە، هەر لە كوردستان خۆیان تۆمار بكەن”، گەیلان حاجی سەعید وای وت.

رێگرییەکانی حکومەتی عێراق چەندین کارگەی لە کوردستان داخستووە

ئەوەشی خستەڕوو، ئەگەر لەگەڵ یەكێتیی ژوورە بارزگانی و پیشەسازییەكانی عێراق پەیوەندییان باشە و لەگەڵ ئەوانیش کۆبوونەوە و گفتوگیان دەبێت.

ئەوەشی خستەڕوو، دەیانەوێت بەو پەیوەندییە باشەی هەیانە، كێشەكانیان چارەسەر بكەن و بگەنە رێككەوتنێك بۆ ئەوەی كارگەكانی كوردستان بەرهەمەكانیان بگەیەننە هەموو ناوچەكانی عێراق و ئاسانكاری بۆ هەمووان دروست بكرێت.

ماوەیەكە حكومەتی عێراق رێگە نادات كۆمپانیا و كارگەكانی كوردستان بەرهەم و كاڵاكانیان بگەیەننە بازاڕەكانی ناوەڕاست و باشووری عێراق بە بیانووی ئەوەی مۆڵەتی كاركردنی خۆیان لە بەغدا تۆمار نەكردووە.