زیانلێکەوتووانی خورماتوو قەرەبوو دەکرێنەوە

964+

سیروان خورشید

ئەمڕۆ چوارشەممە 30.10.2024 پارێزگاری سەلاحەدین سەردانی قەزای خورماتووی کرد و لەگەڵ بەرێوەبەری فەرمانگەکان و یەکە ئیدارییەکان کۆبووەوەو بڕیاری بە قەرەبووکردنەوەی سەرجەم زیانلێکەوتوانی جەنگ و ئۆپەراسیۆنە سەربازییەکانى سنووری خورماتوو.

بەدر فەحل، پارێزگاری سەڵاحەدین بە 964ـی وت، قەرەبووی سەرجەم زیانلێکەوتووانی ئۆپەراسیۆنەکانی جەنگ و هەڵەی سەربازی و شەڕ و ئاڵۆزییەکانی نێوان پێکهاتەکان دەکرێتەوە، چونکە لە رابردوودا بەهۆی ئاڵۆزی و کردەوە تیروریستییەکانی سنورەکە، خەڵکانێکی زۆر توشی زیانی گیانی ومادی بوون و لەئێستادا بڕیاریان داوە بە بڕی 35 ملیار دینار، قەرەبوی زیانلێکەوتووانی پارێزگاکە بکەنەوە.

محەمەد جەعفەر، بەڕێوەبەری فەرمانگەی قەرەبووکردەوەی خورماتوو بە 964ـی وت، لە سنوری خورماتوو زیاتر لە پێنج هەزار کەس ناوی خۆیان بۆ قەرەبوکردنەوە تۆمارکردووەو هەفتانە، ناوی نزیکەی 200 کەس بڵاودەکرێتەوە کەزیانیان بەرکەوتووەو چەکی قەرەبویان پێ دەدرێت.

وتیشی، زیانلێکەوتووان بە رێژەی %50 قەرەبووی زیانەکانیان دەکرێتەوەو ئەو کەسانەش کە زیانیان بەرکەوتوەو ناویان لەلیستی قەرەبوکردنەوەدا نیە، دەبێت سەردانی فەرمانگەی قەرەبوکردنەوە بکەن بۆ ئەوەی ناویان تۆماربکەن”.

قەزای دوزخورماتوو لەرووی ئیدارییەوە سەر بە پارێزگای سەڵاحەدینە و دانشتووانەکەی لەکورد و عەرەب و تورکمان پێکهاتوون، لەساڵی 2014 تاوەکو 2017 دەیان شەڕو ئاڵۆزی لەسنورەکەدا روویداوە”.

پێداچوونەوە: هاوبەش

+1