كۆمیسیۆنی باڵای هەڵبژاردن: چاوەڕێین سبەی گەرموگوڕیی هەڵبژاردن بەردەوام بێت

964+

ئەرسەلان عەبدوڵا

كۆمیسیۆنی باڵای سەربەخۆی هەڵبژاردنەكانی عێراق رایگەیاند، پرۆسەی دەنگدانی تایبەت زۆر گەرموگوڕ بوو، هیوای ئەوە دەخوازن سبەی یەكشەممەش دەنگدانی گشتی ئاوا جەماوەری و گەرموگوڕ بێت.

كۆمیسیۆنەكە ئەمڕۆ شەممە 19.10.2024 راگەیاندراوێكی بڵاوكردەوە و تێیدا ئاماژە بەوە دەكات، دوای داخستنی بنكەكانی دەنگدانی تایبەت لە هەرێمی كوردستان، بە پێی داتاكان رێژەی بەشداربوون لە دەنگدان 97% بوو، كە ئەوانەی مافی دەنگدانیان هەبوو 215 هەزار و 960 كەس بوون لە هێزە ئەمنییەكان بە هەموو جۆرەكانییەوە.

كۆمیسیۆنی هەڵبژاردن دەڵێت، “هەڵبژاردنەكە لە ژێر سەرپەرشتیی نەتەوە یەكگرتووەكان، چاودێرانی دەرەكی و ناوخۆیی، رێكخراوەكانی چاودێری هەڵبژاردن و دەزگاكانی میدیا بەڕێوەچوو، هیچ پێشێلكارییەكی ئەمنی و هیچ كێشەیەكی تەكنیكیی ئەوتۆش رووینەداوە شایانی باس بێت”.

كۆمیسیۆنی باڵا رایدەگەیەنێت، “سوپاسی بەشداربووانی دەنگدانی تایبەت، چاودێرانی نێودەوڵەتی و ناوخۆیی، میدیاكاران و حزب و لایەن و هاوپەیمانییەتییەكان و كاندیدەكان دەكەین، كە بەشداربوون لە سەركەوتنی پرۆسەكە و بەڕێوەچوونی بە شێوەیەكی شەفاف و پاك، كۆمیسیۆن بەهیوایە ئەو گەرموگوڕیی هەڵبژاردن لە پرۆسەی دەنگدانی گشتییشدا سبەی بەردەوام بێت”.

كۆمیسیۆنی باڵای سەربەخۆی هەڵبژاردنەكانی عێراق، سەرپەرشتیی هەڵبژاردنی خولی شەشەمی پەرلەمانی كوردستان دەكات، كە دوێنێ هەینی دەنگدانی تایبەت ئەنجامدرا و سبەی یەكشەممەش دەنگدانی گشتی بەڕێوەدەچێت.

زۆرینەى هاوڵاتیان بەشدارى هەڵبژاردن دەکەن