دیمهنێكى قوتابیانى نابینا و كهمبیناى هه‌ولێر لهكاتى ئهنجامدانى تاقیكردنه‌وه‌كانى كۆتایی ساڵ... وێنه: بەرێوەبەرایه‌تی گشتی چاودێری و گەشەپێدانی كۆمەلایەتی.
پاره‌ى گیرفان و ژه‌مى خواردنیشیان بۆ دابینكراوه
ئه‌مساڵیش قوتابیانی خاوەن پێداویستی تایبەت لەگەڵ قوتابیانی ئاسایی ده‌ستیان به خوێندن كرد
964+
فه‌رهاد حه‌سه‌ن
ئه‌مساڵ له هه‌رێمى كوردستاندا قوتابیانی خاوەن پێداویستی تایبەت لەگەڵ قوتابیانى ئاسایی ده‌ستیان به پرۆسه‌ى ساڵى نوێى خوێندن كرده‌وه و وه‌زاره‌تى كاریش ده‌ڵێت، بۆ خزمه‌تگوزارى نوێمان بۆ قوتابینى خاوه‌ه‌ن پێداویستی تایبه‌ت دابین كردووه.
پەیمانگەكانی رووناكی، ئاوات، هیوا و هانا، چه‌ند په‌یمانگایه‌كی تایبه‌تن به منداڵانى خاوه‌نى پێدوایستى تایبه‌ت و له به‌شێك له پارێزگا و ئیداره سه‌ربه‌خۆكان دامه‌زراون و سه‌ر بە وەزارەتی كار و كاروباری كۆمەڵایەتین.
بەرێوەبەرایه‌تی گشتی چاودێری و گەشەپێدانی كۆمەلایەتی بڵاویكرده‌وه، هاوكات له‌گه‌ڵ ده‌ستپێكردنه‌وه‌ى پرۆسه‌ى ئاسایی خوێندن، ئه‌وانیش زه‌نگی ده‌ستپێكردنى خوێندنیان بۆ منداڵانى خاوه‌ن پێداویستى تایبه‌ت لێداوه.
یوسف چاوشین بەرێوەبەری گشتیی چاودێری و گەشەپێدانی كۆمەڵایەتیی هەولێر ده‌ڵێت، پێشتر دەوامی قوتابیانی خاوەن پێداویستی تایبەت لە مانگی 12 دەستیپێدەكرد، بەڵام ماوەی چوار ساڵە ئەوە راستكراوەتەوە و ساڵانە لەگەڵ قوتابی ئاسایی دەوامیان دەستپێدەكاتەوە.
باسی لەوەش كرد، ئەمساڵ جگە لە پێدانی هاوكارى و دابینكردنی پاس، حكومەت پاره‌ى گیرفان و ژەمێك خواردنیشی بۆ قوتابیان دابینكردووە.
ته‌نیا له پەیمانگەی رووناكی نابینایان لە هەولێر 72 منداڵی نابینا و كەمبینا تێیدا درێژە بە خوێندن دەدەن.
پێشتریش یوسف چاوشین به 964ـى وتبوو، له سنوورى هه‌ولێر 95 قوتابی نابینا و 170 قوتابی نابیست كه له پۆلى نۆى بنه‌ڕه‌ت بوون به‌شداریبان له تاقیكردنه‌وه‌كانى كۆتایی پارساڵ كردبوو.
