دیمەنی بەرپرسانی قەزای دەربەندیخان لە شوێنی پرۆژی ئاوەڕۆی بەنداوی دێوانە.وێنە.قایمقامیەتی دەربەندیخان
چیتر ئاوی زێراب تێکەڵی بەنداوەکە نابێت
پرۆژەی ئاوەڕۆی سندوقی بەنداوی دێوانە راگەیەندرا
964+
توانا نەقی
پرۆژەی ئاوەڕۆی سندوقی لە نزیک بەنداوی دێوانە لە دەربەندیخان راگەیندرا و وابڕیارە هەفتەی داهاتوو دەست بە کارکردن بکرێت لە پرۆژەکەدا.
لە ساڵی 2011ـەوە دەبوو ئەم پرۆژەیە جێبەجێ بکرایە بەڵام بە قسەی شارەوانی دواکەوتووە بە چەند هۆکارێک و لە ناویاندا هۆکارایی داراییە
عوسمان عەبدوڵا سەرۆکی شارەوانی دەربەندیخان بە 964ـی وت، ئەم ئاوەڕۆ سندوقییە بە درێژایی شەش کیلۆمەتر دەبێت و بە تەواوبوونی جارێکی دیکە هیچ ئاوەڕۆیەکی پیس و زێراب تێکەڵی بەنداوەکە نابێتەوە.
وتیشی، هەموو رێکارە ئیداریەکانی کۆمپانیای جێبەجێکار کە کۆمپانیای پاراوە تەواو بووە و ئیتر لە سەرەتای هەفتەی داهاتووەیەوە دەست دەکرێت بە کارکردن لە پرۆژەکەدا .
پرۆژەی ئاوەڕۆی سندوقی بەنداوی دێوانە تێچووەکەی 6 ملیار و 956 ملیۆن دینارە و دەبێت لە ماوەی دووساڵی داهاتوودا تەواو بکرێت.
سلێمان محەمەد قایمقامی دەربەندیخان لەسەر پرۆژەکە بە 964ـی وت، ئەم پرۆژەیە بەنداوەکە لە هەموو جۆرە پیس بوونێک دەپارێزێت پێشتر هەموو ئاوی زێراب و ئاوەڕۆی پیسی ماڵان دەڕژانە بەنداوەکەوە.
بەنداوی دێوانە دەکەوێتە قەزای دەبەندیخان و 42 مەتر بەرزە و 260 مەتر پانە توانای گلدانەوەی 21 ملیۆن مەتر سێخا ئاوی هەیە.
