تەنیا بۆ هێلکە کردنە
سامانی ئاژەڵی سلێمانی: خواردنی مریشکی سوور مەترسیدارە
964+
رێژوان مامە قادر – سلێمانی
بەڕێوەبەرایەتیی سامانی ئاژەڵی سلێمانی هۆشداری لە خواردنی مریشکی سوور دەدات و بە مەترسیداری دەزانێت.
جەمال حسێن، بەڕێوەبەری سامانی ئاژەڵی سلێمانی بە 964ـی راگەیاند، مریشکی سوور بۆ خواردن ناشێت و تەنانەت خواردنی مەترسیداریشە.
وتیشی، “ئەو مریشکە بۆ هێلکەکردنە و ماوەی دوو ساڵ لە قاعەکانی هێلکەکردن رادەگیرێن، چەندان ڤاکسین و دەرمانیان پێدەدرێت کە بۆ تەندروستی مرۆڤ مەترسیدارن”.
بەپێی زانیارییەکانی بەڕێوەبەرایەتییەکە، زۆرینەی مریشکی سوور لە پارێزگاکانی عێراقەوە دەگاتە هەرێمی کوردستان و لە ناوخۆشدا چەند پڕۆژەیەکی هێلکە هەن و ئەو مریشکانەیان هەیە و دوای دوو ساڵ راگرتنیان دەیانفرۆشن.
بەڕێوەبەری سامانی ئاژەڵی سلێمانی وتیشی، “ئەو مریشکانە دەبێت سەر ببڕدرێن و بکرێن بە پەین نەک بفرۆشرێن و هاوڵاتی بیخوات”.
لای خۆشیەوە عوسمان جەمال، پزیشکی ڤێتێرنەری بە 964ـی راگەیاند، ئەو مریشکە سوورانە هیچ بەهایەکی خۆراکییان نییە و نابێت بخورێن.
وتیشی، “خاوەنی قاعەکانی هێلکەکردن دوای دوو ساڵ دەریان دەکەن و لە جیاتی سەربڕین هەر مریشکێک ئەگەر دوو هەزار دیناریش بۆ ئەوان بکات زۆرە و دەیفرۆشن”.
پێداچوونەوە: توانا نەقی
