لە ناوچە گەشتیارییەکانى سۆران
بەبێ هێلەگ رێگە بە مەلەکردن نادرێت
964+
وریا فەتاح
بۆ پاراستنی گیانی گەشتیاران لە ئەمڕۆ بەدواوە سەرجەم شوێنە گەشتیارییەکانی سنوورى سۆران ناچار کراون بەبێ لەبەرکردنی هێلەگ رێگە بەهیچ گەشتیارێک نەدرێ لەشوێنە گەشتیارییەکان مەلە بکات.
لە هۆشدارییەکەدا بەرگرى شارستانى سۆران روونى کردووەتەوە، شوێنە گەشتیارییەکان ئاگادار کراون کە نابێت بەبێ لەبەرکردنى هێلەگ یاخود بە بەلەمى بچوک، رێگە بە گەشتیاران بدەن بچنە ناو ئاوەوە.
بە جەختکردنەوە لە گرتنەبەرى رێوشوێنى یاسایى، ناوچە گەشتیارییەکان ناچارکراون بە لەبەرچاوگرتنى ئەو رێکارانە رێگرى لە هەر رووداوێکى نەخوازراو بگرن.
پێشترو لە 9.6.2024، خنکانى چوار گەشتیار لە کەمتر لە مانگێکدا، بەرپرسانى ئیدارەى سەربەخۆى سۆرانى ناچار بە کۆبوونەوەیەک کرد کە تێیدا بڕیار بدەن بە داخستنى ئەو شوێنانەى مەرج و سەلامەتیان تێدا نییە.
لە کۆبوونەوەکەدا بەرگری شارستانی 28 مەرج و رێنمایی دیاری کردوە بۆ شوێنە گەشتیارییەکان، کە مەرجی لە پێشینە، هەڵواسینی تابلۆ و تەلبەند کردنی سەر رووبارەکان و رێکخستنەوەی شوێنە گەشتیارییەکانە.
