داوای راگرتنی دەکرێت
سورییەکان لە هەولێر و بەغدا دەست بەسەر دەکرێن
964+
پەروەر خۆشناو
” هیومەن رایتس وۆچ” داوای راگرتنی هەڵمەتی دەستبەسەرکردن و ناردنەوەی زۆرەمڵێی سووریەکان لە هەرێمی کوردستان و عێراق دەکات.
لە دواین بەدواداچوونی دامەزراوەی “هیمان رایتس وۆچ – Human Rights Watch ” باس لەدەستبەسەکردن و بەزۆر ناردنەوەی ئەو سوریانە دەکات کە لە کوردستان و عێراق نیشتەجێن.
سارا سەنبار لێکۆڵەری ئەو دامەزراوەیە لە رێککەوتی ” 19 بۆ 26″ـی مانگی چواری ئەمساڵ لەگەڵ حەوت هاوڵاتی سوری بە تەلەفۆن گفتوگۆی کردووە کەوا چواریان لە لایەن ئاسایشـەوە دەستبەسەر کراوون لە فڕۆکەخانەی نێودەوڵەتی هەولێر و چاوەڕێی ناردنەوەیان بوون بۆ سوریا بەبێ رەزامەندی خۆیان.
لە بەدواداچوونەکەی ئەو دامەزراوەیە، ئەو کەسانە خاوەن مۆڵەتی مانەوەی هەرێمی کوردستان و عێراقـیان هەبووە و ناویان لە کۆمسیۆنی باڵای پەنابەرانی نەتەوە یەکگرتووەکان – UNHCR تۆمارکراوە.
مانگی چواری 2024 حکومەتی هەرێمی کوردستان پێدان و نوێکردنەوەی مافی مانەوەی “ئیقامە”ـی بۆ هاووڵاتیانی سوری راگرتووە.
هەر بەگوێرەی ئەم دامەزراوەیە، 280 هەزار هاوڵاتی سووری لە عێراق نیشتەجێن و زۆرینەیان لە هەرێمی کوردستانن.
لێکۆڵەری ئەو دامەزراوەیە بۆ ئەم بابەتە پەیوەندی بە وەزارەتی ناوەخۆی عێراق کردووە و بەڵام وەڵامیان نەداوەتەوە.