دیمەنێکی رووداوەکە. فۆتۆ: تۆڕی X
برینداریش هەن
شەڕەتەقەیە و دوو کەس کوژران
964+
ئەرسەلان عەبدوڵا
ئەمڕۆ هەینی لە دەرەوەی دوکانێکی سەوزە و میوە لە ویلایەتی ئارکانساسی ئەمریکا، بووە شەڕەتەقە و لانیکەم نۆ كەس تەقەیان لێکرا و دوو کەسیان کوژران.
میدیاکانی ئەمریکا بە پشتبەستن بە پۆلیسی ویلایەتی ئارکانساس ئەمشەو “بە كاتی كوردستان” بڵاویانکردەوە، لە دەرەوەی دوکانێکی سەوزە و میوە لە شاری فۆردیس لە ویلایەتی ئەرکانساس، تەقە لە نۆ کەسی مەدەنی کرا و دوو کەسیان کوژراون.
لە هەواڵەكەدا ئاماژە بەوە كرا ئەفسەرێکی پۆلیسیش تەقەی لێکراوە، بەڵام برینەكەی سەخت نییە.
پۆلیسی ویلایەتەكە هەروەها رایانگەیاند تەقەکەرەکە “بە سەختی بریندار بووە” دوای ئەوەی ئەفسەرەکان تەقەیان لێکردووە و دەستگیر کراوە.
لای خۆیەوە سارا هاکابی ساندەرز، پارێزگاری ویلایەتی ئەرکانساس لە بەیاننامەیەکدا لەسەر پلاتفۆرمی ئێکس رایگەیاندووە، لە رووداوی تەقەکردنەکە ئاگادارکراوەتەوە و بەردەوام لە پەیوەندیدایە لەگەڵ پۆلیسی ویلایەتەکە لە شوێنی رووداوەکە.
