ئاگر گەیشتووەتە رەز و باخەکان
بەهۆی تۆپبارانەوە رووبەرێکی زۆر لە چیای مەتینا سووتا
964+
زەید کۆچەر-دهۆک
ئەمڕۆ هەینی جارێکی دیکە بەهۆی تۆپبارانەوە، کە پێدەچێت لەلایەن سوپای تورکیاوە بێت، ئاگر لە چیای مەتینا کەوتەوە و بووە هۆی سووتانی ژمارەیەک داری زۆر و رووبەرێکی فراوانی زەوی لە سنووری هەردوو گوندی گوهەرزێ و بەلاڤە.
مەحمود نهێلی، هاوڵاتییەکی ناحیەی دیرەلۆکە، ئەو بە 964ی وت، تەنیا ئەمڕۆ زیاتر لە 10 گولـلە تۆپی سوپای تورکیا بەر چیای مەتینا کەوتوون لە بەرامبەری سەنتەری ناحیەی دیرەلۆک و بەوهۆیەوە ئاگر لە ناوچەکە کەوتووەتەوە زیان بەر رەز و باخی هاوڵاتییان کەوتووە.
ئەحمەد گوهەرزێ، موختاری گوندی گوهەرزێ بە 964ی وت، لە ماوەی دوو هەفتەدا نزیکەی 50 دۆنم زەوی هاوڵاتیان سووتاوە و زیان بەر دارە بەرهەم دارەکانیان کەوتووە و هەمووی سووتاوە و کەس ناوێرێت بگاتە ئەم شوینانە بەهۆی مەترسی بوردوومان کردن.
بێوار عەبدولعەزیز، وتەبیژی بەرگری شارستانی دهۆک بە 964ی وت، شوێنی ئاگرەکان مەترسیدارە و رێگەکەی باش نییە، بۆیە هیچ کات کارمەندمان ناخەینە مەترسییەوە و بیاننێرین بۆ ئەم شوێنانە بۆ کۆنترۆلکردنی ئاگر.
پێداچوونەوە: هاوبەش
