خزمەتگووزاری نییە
گەڕەکە تازەکەی کۆیە دەناڵێنێت
+964
گۆڤەند فەتاح – کۆیە
گەڕەکە نوێییەکەی شاری کۆیە، گەڕەکی نەورۆز 10 ساڵە هەیە و تا دێت ئاوەدانتر دەبێت، ئەوەی دانیشتوانی گەڕەکەکەی نیگەران کردووە کەمی خزمەتگووزارییە و شارەوانیش دەڵێت، ئەوەی عایدی ئێمە بێت دەیکەین .
گەڕەکەکە خانووەکانی تاپۆن و کێشەی ئاوەڕۆ و کۆنکرێت نەکردنی کۆڵانەکانیان هەیە، پێشتر کارەباشیان نەبوو دانیشتوانی ئەو گەڕەکە خۆیان هەستاون بە هێنانی کارەبا بۆ گەڕەکەکە و حکومەت تەنیا ئەرکی ستوونی لە ئەستۆ گرتووە .
هاوکار عەزیزی، دانیشتووی گەڕەکی نەورۆز قسەی کردووە بۆ 964 و دەڵێت، چەندینجار سەردانی شارەوانی و قائیمقاممان کردووە، چوونکە گەڕەکەکەمان لە زۆر خزمەتگووزاری بێبەشە، وەک: نەبوونی ئاوو ئاوەڕۆ و کۆنکرێت نەکردنی کۆڵانەکانمان کە بۆتە کێشە بۆمان لە وەرزی زستان و هاویندا .
موحەممەد میرحاج، سەرۆکی شارەوانیی کۆیە بە 964ی وت، ئەوەی لەسەر ئێمە بووە و پەیوەندی بە شارەوانییەوە هەبووە کردوومانە وەک تێکەڵەڕێژ کردنی گەڕەکەکان، بەڵام ئاوو و ئاوەڕۆ پەیوەندی بە ئێمەوە نییە.
گەڕەکی نەورۆز، لە نزیک بەشەناوخۆییەکانەوە دەستپێدەکات تاوەکو نزیک قوتابخانەی حاجی قادری کۆیی، لەم چەند ساڵەی رابردوو بەشێوەیەکی بەرفروان خانوو لەو گەڕەکە دروستدەکرێت و تا دێت فراوانتریش دەبیت، بەڵام خزمەتگوزارییەکانی وەک پێویست نییە.
پێداچوونەوە : سۆما حەکیم زادە