هەڵمەتێک دەستیپێکرد
سۆران رووبەڕووی مادەی هۆشبەر دەبێتەوە
964+
ئاکام غەفور – سۆران
هەڵمەتی بەرەنگاربوونەوەی مادەی هۆشبەر، کە لەلایەن حکومەتی هەرێمی کوردستانەوە بڕیاری لەسەردراوە، یەکەمجار لە ئیدارەی سەربەخۆی سۆرانەوە دەستیپێکرد، سەرپەرشتیاری ئیدارەکەش دەڵێت، بەهۆی هاوسنوربوون لەگەڵ ئێران و تورکیا، ناوچەکە هەستیارە.
ئەمڕۆ یەکشەممە 2.6.2024، هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە 964ـی وت، هەڵمەتێکی رووبەرووبوونەوە و هۆشیارکردنەوەمان لەدژی مادەی هۆشبەر دەستپێکردوە، سۆران شوێنێکی هەستیارە بۆ ئەو بابەتە چونکە لەگەڵ تورکیا و ئێران هاوسنورە دەمانەوێت رێگری بکەین لە بڵاوبونەو و بازرگانی کردن بە مادەی هۆشبەر.
وتیشی” داواکاریمان پێشکەشی ئەنجومەنی وەزیران کردوە بۆ کردنەوەی سەنتەرێکی چارەسەرکردنی ئاڵوودەبووانی مادەی هۆشبەر لە سۆران”.
دەشلێت، لە چوارچێوەی هەڵمەتەکەدا مامۆستایانی ئاینی خەڵک هۆشیار دەکەنەوە و لە قۆناغی ئێستاشدا لە رێگای سێکتەری پەروەردە و خوێندنی باڵا دەمانەوێت هۆشیاری بە خەڵک بدەین.
ئیدارەی سەربەخۆی سۆران شەش قەزای هەیە، خاوەنی 14 ناحیە و نزیکەی 800 گوندە، ژمارەی دانیشتوانی ئیدارەکە 380 هەزار کەسە.
پێداچوونەوە: هاوبەش