964+
''شەیتان ناگەڕێتەوە بۆ بەهەشت''
حەلبوسی هیوای بەپێنج لاپەڕەکەیە بۆ ئەوەی ببێتەوە سەرۆکی پەرلەمان
964+
ژوورى هەواڵ
ناکۆکییەکەی نێوان دوو گەورە دادگاکەی عێراق دۆخێکی نوێی لە عێراقدا هێناوەتە ئاراوە، یەکەمجارە دەسەڵاتێک هەبێت بە دادگای فیدراڵی بڵێت ”بوەستە، ئەمە کاری تۆ نییە”، ئەوەی روویدا بڕیارێکی ئاسایی نییەو زۆر هیوای لەسەر هەڵچنراوە، محەمەد حەلبوسیش یەکێکە لەو ”خۆش باوەڕانە”.
خولاسەی بابەتەکە:
دوێنێ دادگای تێهەڵچوونەوەی فیدراڵی نوسراوێکی پێنج لاپەڕەیی بڵاوکردووەتەوە، بۆ یەکەمجار دژی بڕیارێکی دادگای باڵای فیدراڵی دەوەستێتەوەو دەڵێت، ئەوە کاری تۆ نییە.
پێش ماوەیەک عەلی بنیان گحیت، دادوەری دادگای لێکۆڵینەوەی شرگات چووە لە دادگای باڵای فیدراڵی داوایەکی دژی فایەق زێدان سەرۆکی ئەنجومەنی باڵی دادوەری تۆمارکردووە، وتویەتی من مافی خۆمە خانەنشین ببم، بەڵام فایەق زێدان ناهێڵێت، دادگای باڵای فیدراڵیش بڕیاری داوە: ئەو دادوەرە مافی خۆیەتی خانەنشین ببێت، هەر کەسێک سەروو سی ساڵ خزمەتی هەبێت دەتوانێت خانەنشین ببێت و 80%ـى موچەکەی وەربگرێت.
لە عێراق دادگایەکی تر هەیە بەناوی ”دادگای تێهەڵچوونەوەی فیدراڵی” ئێستا ئەم دادگایە پێنج لاپەڕەی دژی بڕیارەکەی دادگای فیدراڵی بڵاوکردووەتەوەو دەڵێت، ئەو دادوەرە بۆ نییە خانەنشین بێت، چونکە دەستی لەکار کێشاوەتەوە، بە دادگای باڵای فیدراڵیشی وتووە ”نابێ بهێڵین دەسەڵاتەکان تێکەڵ ببن”.
یەکەمجارە لە عێراقدا شتی وا رووبدات، چونکە ئەوەی تائێستا خەڵک زانیویەتی ئەوەیە بڕیارەکانی دادگای باڵای فیدراڵی حوکمی کۆتایی وەردەگرن، کەچی ئێستا دادگایەکی تر هەیە رایدەگرێت.
هیوای حەلبووسی بۆ گەڕانەوە
چەند مانگی رابردوو دادگای فیدراڵی راست و چەپ کەوتە ناو بابەتە سیاسییەکان و بەخێرایی چەند بڕیارێکی دەرکرد، لەوانە لابردنی محەمەد حەلبوسی لە سەرۆکی پەرلەمان، هەڵوەشاندنەوەی درێژکردنەوەی تەمەنی پەرلەمانی کوردستان و کۆمسیۆنی هەڵبژاردن، لابردنی کورسی کۆتاکان.
ئەگەر بەپێی ئەمە بێت ئەوە ئەو بڕیارانەش قابیلی هەڵوەشاندنەوەن، بۆیە هەوادارانی حەلبووسی لە سۆشیال میدیا بەچڕی باسی ئەوە دەکەن دادگای تێهەڵچوونەوە دەتوانێت بڕیارەکەی دادگای فیدراڵی هەڵبوەسێنێتەوە، بەڵام لە راستیدا ئەمە وانییە.
نەیارەکانی حەلبووسی دەڵێن: ئەو بڕیارەی دادگای تێهەڵچوونەوە داویەتی کەیسێکی تایبەتە، هەڵەکە لە دادگای باڵای فیدراڵی بووە، نەدەبوو داوای دادوەرەکەی شرگاتی وەربگرتایە، چونکە پسپۆڕی ئەو نییە، هەر لەبەر ئەو هەڵەیەیە دادگای تێهەڵچوونەوە توانیویەتی دژی ئەو بڕیارە بوەستێتەوە، ئەگەرنا لە هەموو دۆسێ گرنگەکان و دۆسێ باڵاکاندا کەس ناتوانێت بڕیاری دادگای باڵای فیدراڵی هەڵبوەشێنێتەوە، مەگەر خۆی لێیان پاشگەز ببێتەوە.
عیزەت شابەندەر سیاسەتوانێکی سەربەخۆی شیعەیە، بەڵام هیچ کەیفی بە حەلبووسی نایەت، دوای هەڵمەتی لایەنگرەکانی حەلبووسی لە ئێکس ئاوهای نوسیوە ”بڕیارەکەی دادگای تێهەڵچوونەوەی ئیتیحادی پەیوەستە بە بابەتێکی دیاریکراوەوەو هیچ رێگایەک نییە بۆ شێواندنی مەبەستەکەی، پەیوەندی نییە بە گەڕانەوەی ئیبلیس بۆ بەهەشت، یان گەڕانەوەی لەگۆڕنراو بۆ حوکمی عێراق.. کەسی عاقڵ تێدەگات”.
ئەنجامەکەی مەترسیدارە
سەرچاوەیەکی باڵای دادوەری لە بەغدا قسەی بۆ بەشی عەرەبی تۆڕی 964 کردووەو دەڵێت ”ئەنجامی ئەمە مەترسیدار دەبێت”.
ئەو سەرچاوەیە خۆی داوای کردووە ناوی نەنوسرێت دەڵێت ”بڕیارەکانی دادگای باڵای فیدراڵی تەنانەت لە سەروو یاساکانەوەن، بگرە دەکەونە سەروو دەستوورەوە، بەڵام لێرە دەسەڵاتێکی دادوەری دەڵێت دان بەو بڕیارانەدا نانێم بەو بیانووەی تایبەتمەنی ئەو نییە، بەم پێیەش پێشێلی ئەو دەقە دەستوورییە دەکات کە دەڵێت بڕیارەکانی دادگای فیدراڵی کۆتایی و یەکلاکەرەوەن، وابڕوات لە ئایندەدا دادگاکانی دیکەش وا دەڵێن، ئەمەش ئەنجامەکەی زۆر مەترسیدار دەبێت”.
