دیمەنێکی بارانبارین لە یەکێک لە شەقامەکانی کوردستان - وێنە: 964
هۆشداری بە جوتیاران دەدرێت
شارەزایەکی کەشناسی: هەفتەی داهاتوو دوو شەپۆلی تری باران روو لە هەرێم دەکات
964+
فەهمی نەبی
شارەزایەکی کەشناسی دەڵێت، سەرەتای ئەم مانگە دوو شەپۆلی دیکەی باران روو لە ناوچەکانی هەرێم دەکات ئەگەر وەک ئەوەی ئێستا هەیە بە جێگیری بمێنێتەوە، بەهۆی بوونی با و هەورە بروسکە زیانی بۆ گەنم و جۆ دەبێت.
سیروان ساڵح شارەزای کەشناسی، بە 964ی راگەیاند، لە ئێوارەی رۆژی چوارشەممەوە تاوەکو دووشەممەی هەفتەی داهاتوو دوو شەپۆلی بەهێزی باران چالاک دەبن، هەورە بروسکەو بارانیشی لەگەڵ دەبێت و ناوچەکانی هەرێم دەگرێتەوە.
ئەو شارەزایەی کەشناسی دەڵێت، سەرچاوەی هەردوو شەپۆلەکه هەردوو دەریای سوور و دەریای ناوەڕاستە، جگەلەوەش ئەگەر هەیە شێی خولگەیی دەریای عەرەبی و باشوری سودان شەپۆلەکە زیاتر بەهێز بکات و هەوری بەهێزی کەڵەکە یان (سۆپەرسێڵ) دروست ببێت.
سیروان ساڵح هۆشداری بە جوتیاران دەدات و دەڵێت، بارینی باران لەم کاتەدا، زیانی بۆ گەنم و جۆ هەیە، چونکە بارانی بەخوڕ و هەورە بروسکە و با زیانی دەبێت، لەکاتێکدا لە وەرزی دروێنە نزیک دەبینەوە، بۆیە ئەو شوێنانەی گەنمەکانیان ئامادەیە باشترە تا رۆژی سێشەممە زوو دروێنەی بکەن.