هاتووچۆى گەشتیارى لە مەرزى باشماخ پەکى کەوت

+964

کامیار کەمال_ پێنجوێن

جارێکی دیکە سیستمی تۆمارکردنی گەشتیارانی لە مەرزی باشماخ، دیوی ئێران لەکار کەوتەوە و هاتوچۆی گەشتیاری پەکی کەوت.

ماوەی نزیکەی حەوت کاتژمێرە سیستمەکە وەستاوە.

سەرچاوەیەک لە مەرزی باشماخ بە 964ـى راگەیاند، لە کاتژمێر 3:00تى پاش نیوەڕۆى ئەمڕۆ پێنجشەممەوە، لە دیوى ئێرانەوە ئاگادارکراینەوە کە هاتووچۆى گەشتیارى بوەستێنین ئەوەش بەهۆى لەکارکەوتنى سیستمى تۆمارکردنى گەشتیاران.

لەکارکەوتنى سیستەمەکە بەهۆى پچڕانى هێڵى ئینتەرنێتە، بەوتەى سەرچاوەکەش بۆ ئەوەى قەرەباڵغى دروست نەبێت لە دیوى هەرێمى کوردستانەوە گەشتیاران وەستێنراون و چاوەڕێ دەکەن تا سیستەمەکە دەکەوێتەوە کار، ئینجا رێگە بە گەشتیاران بدەن.

لەبارەى کەوتنەوەکارى سیستەکەکە، ئەو سەرچاوەیە روونیکردەوە بەهۆى ئەوەى کێشەکە لە دیوى ئێرانە، جارێ نازانن کەى دەکەوێتەوە کار.

سەرچڵ رەفیق، شۆفێری تانکەر بە 964ـى راگەیاند، بەهۆی وەستانی سیستمەکەوە تەنیا هاتووچۆى گەشتیار رانەگیراوە، بەڵکوو شۆفێرانی بارهەڵگر و تانکەرەکانیش نەیانتوانیوە بچنە دیوی ئێران.

لە ماوەی 10رۆژی رابردوودا ئەمە دووەم جارە سیستمی تۆمارکردنی گەشتیاران دەوەستێت و لە 15.4.2024 هەمان کێشە روویدا و دوای 24 کاتژمێر دووبارە سیستمەکە کەوتەوە کار.

پێداچوونەوە: وریا فەتاح

زیاتر لە حەوت کاتژمێرە سیستمی تۆمارکردن لە مەرزی باشماخ وەستاوە