بەشێکی تاسڵوجە لە سلێمانی - وێنە: میدیاکان
زۆرینەیان ئاوەڕۆن
ژمارەیەک پڕۆژە بۆ تاسڵوجە جێبەجێ دەکرێن
964+
پێشەوا محەمەد
ژمارەیەک پڕۆژە بۆ تاسڵوجە لە شاری سلێمانی جێبەجێ دەکرێن و بەڕێوەبەری شارەوانییەکەی دەڵێت، پلانی جوانکردنی دەروازەکەی و سەرجەم خانووەکانیان هەیە.
سەرهەد حاجی، بەڕێوەبەری شارەوانیی تاسڵوجە چووەتە لای سەرۆکی شارەوانیی سلێمانی و داوای جێبەجێکردنی ژمارەیەک پڕۆژەی لێکردووە بۆ تاسڵوجە.
ناوبراو بە 964ـی وت، “سێ پڕۆژەیان ئاوەڕۆن کە بەتەواوی کێشەی ئاوەڕۆی تاسڵوجە و کۆبوونەوەی ئاو لەسەر شەقامی گشتیی تاسڵوجە – سلێمانی چارەسەر دەکەن”.
وتیشی، “لە تاسڵوجە تا خوار گەڕەکەی کەنەکەوە چاڵێک هەیە بەنیازین بیکەین بە کەناڵێکی گەورەی ئاوەڕۆ و بڕی ملیارێک و 500 ملیۆن دیناری بۆ تەرخان کراوە و گرنگییەکی زۆری بۆ تاسڵوچە و کەنەکەوە و گەڕەکی راپەڕین دەبێت”.
964 زانیویەتی بەهۆی ئەوەی تاسڵوجە لە بەری رۆژئاواوە بووەتە دەروازەی سلێمانی پڕۆژە بۆ جوانکردنی ئەو دەروازەیە هەیە.
“لەگەڵ دروستکردنی شەقامی 100 مەتری و ئەو پردە گەورەیەی تاسڵوجە، دەروازەی هاتنەناوەوەی سلێمانی جوان دەکرێت و دەڕازێندرێتەوە و سەوز دەکرێت و خانووەکانیش جوان دەکرێن”، سەرهەد حاجی وای وت.
بەڕێوەبەری شارەوانیی تاسڵوجە هیوای خواست زوو بوودجە بۆ ئەو پڕۆژانە دابین بکرێت و دەست بە جێبەجێکردنیان بکرێت.
