جۆرێکی جگەرەی ئەیلیکترۆنی - وێنە: ئاژانسەکان
مەترسییەکانی چین؟
پزیشکێک: بەکارهێنانی جگەرەی ئەلیکترۆنی لای هەرزەکاران زیادی کردووە
964+
پێشەوا محەمەد
پزیشکێک هۆشداری دەدات بەکارهێنانی جگەرەی ئەلیکترۆنی لەناو هەرزەکارانی خوار تەمەن 18 ساڵ زۆر بووە و مەترسییەکانیشی روون دەکاتەوە.
عومەر مەحمود جیهانگیر، پزیشکی پسپۆڕی گشتی بۆ 964ـی روونکردەوە، ئەو جگەرە ئەلیکترۆنیانە بۆ حاڵەتێکن کەسێک جگەرەکێش بێت و ماوەیەکی کورت ئەوە بەکاربهێنێت تا جگەرە نەکێشێت و دواتر پێویستە لەوەش دووربکەوێتەوە.
دەشڵێت، “ئێستا ئەو جگەرە ئەلیکترۆنیانە لەناو منداڵانی خوار 18 ساڵدا زۆر بڵاوە و بووە بە مۆدێلێکی جگەرەکێشان”.
وەک ئەو پزیشکە باسی دەکات، جگەرەی ئەلیکترۆنیش هەمان ئەگەری نەخۆشییەکانی شێرپەنجە و نەخۆشیی دڵ و هەناسە و فشاری خوێنی هەیە.
“ئاسانکارییەکی زۆر و مەترسیدار بۆ جگەرەی ئەلیکترۆنی دەکرێت و دەشبێتە هۆی ئالوودەبوونی هەرزەکاران و دەبنە جگەرکێش لە داهاتوودا”، ئەوەش قسەی ئەو پزیشکەیە.
ئەو پێیوایە پێویستە هەڵمەتێکی گەورەی هۆشیاری بەرامبەر مەترسییەکانی جگەرەی ئەلیکترۆنی رابگەیەندرێت و رێکاری پێویست بۆ قەدەغەکردنی بگیرێتەبەر.
