مەیدانی ئاژەڵانی ناحیەی رزگاری - وێنە: 964
بۆ رووبەڕووبونەوەی تای خوێنبەربوون
لە گەرمیان نزیکەی 600 هەزار سەر ئاژەڵ شۆردراون
964+
ژووری هەواڵ
بۆ رێگریکردن لە بڵاوبوونەوەی تای خوێنبەربوون، هۆبەی تەندروستی ئاژەڵ لە ئیدارەی گەرمیان نزیکەی 10 هەزار گەوڕی ئاژەڵی دەرمانڕێژکردووە و نزیکەی 600 هەزار سەر مەڕ و بزنی شۆردووە.
ئەمڕۆ دووشەممە 19.2.2024، د.عوسمان جەمال، بەڕێوبەری ڤێتێرنەری گەرمیان بە 964ـی راگەیاند، لە ماوەی یەک ساڵدا دوو هەزار و 425 ئاژەڵدار سوودمەند بوون لە شۆردنەوەی مەڕ و بزنەکانیان.
“ئەم دەرمانرێژکردن و شۆردنەوەیە بەتەواوەتی رێگری دەکات لە مشەخۆری دەرەکی وەک، مێش، گەنە و کەڕوو… رێگریش دەبێت لە بڵاوبوونەوەی نەخۆشی تای خوێنبەربوون”، د.عوسمان جەمال وای وت.
حەوت تیمی هۆبەی تەندروستی ئاژەڵ لە گەرمیان هەڵمەتەکەیان ئەنجامداوە و کۆی گشتی ئەو مەڕ و بزنانەی شۆردنەوەیان بۆ کراوە 571 هەزار و 368 دانە بوون کە بە هەشت هەزار و 225 لیتر دەرمانی دەلتامسرینی دژە تای خوێنبەربوون شۆردراون.
بەوتەی بەڕێوبەری ڤێتێرنەری گەرمیان تاوەکو ئێستا هیچ حاڵەتێکی تای خوێنبەربوون لە ئیدارەکە تۆمارنەکراوە و تیمەکان لەکاتی پشکنین درکیان بە هیچ حاڵەتێک نەکردووە.
