ساتی دابەشکردنی نەوتەکە. فۆتۆ: قایمقامیەتی چۆمان
هەر خێزانێک 60 لیتری پێدراوە
لە چۆمان 800 خێزان بێبەرامبەر نەوتیان وەرگرت
964+
ژووری هەواڵ
لە سنووری قەزای چۆمان بێبەرامبەر نەوتی سپی دابەشکرا بەسەر 800 خێزانی هەژار و کەمدەرامەتدا.
ئەمڕۆ پێنجشەممە 15.2.2024، ئەحمەد بارزان ئەلیکۆ، قایمقامی چۆمان بە 964ـی راگەیاند، 48 هەزار لیتر نەوت لە سەنتەری قەزاکە و ناحیەکانی سنوری قەزا بێبەرامبەر دابەشکرا.
ناوی خێزانە هەژارەکان لەلایەن بەڕێوەبەرایەتی چاودێری کۆمەڵایەتی دراوە بە قایمقامیەتی چۆمان و هەر خێزانێک بڕی 60 لیتر نەوتی پێدراوە.
بە وتەی قایمقامی چۆمان، نەوتەکە لەلایەن دەزگای خێرخوازی بارزانی دابینکراوە.
جگە لەم نەوتە، لە سەرەتای مانگی رابردووشدا بەشێک لە هاوڵاتیانی قەزای چۆمان لە ناحیەکانی سمیلان، گەڵالە، حاجی ئۆمەران و قەسرێ، بڕی 100 لیتر نەوتیان بە 31 هەزار دینار وەرگرت.
ئیدارەی سۆران یەکێکە لە ناوچە ساردەکانی کوردستان و پێکدێت لە قەزاکانی سۆران، سیدەکان، مێرگەسۆر، چۆمان، رواندز و خەلیفان.
