فڕۆکەخانەی نێودەوڵەتی هەولێر . وێنە: فڕۆکەخانەی هەولێر
گرنگییەکەی چییە؟
ئامادەکاری بۆ کردنەوەی گەشتی ئاسمانی لەنێوان هەرێم و سعودیەدا دەکرێت
964+
پێشەوا محەمەد
بە مەبەستی برەودانی وەبەرهێنان لەنێوان هەرێمی کوردستان و سعودیەدا دەستەی وەبەرهێنان لە ئامادەکاریدایە بۆ کردنەوەی گەشتی ئاسمانی لەنێوان هەرێم و سعودیەدا.
964 لە دەستەی وەبەرهێنانەوە زانیویەتی، شاندێکی وەبەرهێنانی سعودی بە سەرۆکایەتی سەرۆکی سندوقی وەبەرهێنانی ئەو وڵاتە بەم نزیکانە دێنە هەولێر و یەکێک لە باسەکانیان کردنەوەی ئەو هێڵە ئاسمانییە دەبێت.
بەرگەشت ئاکرەیی، وتەبێژی دەستەی وەبەرهێنانی حکومەتی هەرێمی کوردستان بە 964ـی راگەیاند، حکومەتی هەرێم بە نیازە سەنتەرێکی بەبازاڕکردنی بەرهەمە ناوخۆییەکان دابمەزرێنێت و شاندێکی باڵای سعودیەش دێنە هەولێر و دەیانەوێت بەرهەمی هەرێمی کوردستان بۆ سعودییە بگوازنەوە.
وتیشی، “هاتوچۆی ئەو بەرهەمانە لە رێگەی هێڵی ئاسمانییەوە دەبێت، بۆیە یەکێک لە گفتوگۆکان لەگەڵ ئەو شاندەی سعودیە قسەکردنە لەسەر کردنەوەی و ئامادەکاریی تەواو بۆ دەستپێکردنی”.
حکومەتی هەرێمی کوردستان بایەخ بە بەبازاڕکردن و هەناردەکردنی بەرهەمی ناوخۆیی جوتیاران دەدات.
“کردنەوەی ئەو هێڵە ئاسمانییە لەگەڵ سعودییە دەرگای وەبەرهێنان لە سەرجەم بوارەکانی تریش لەگەڵ ئەو وڵاتە واڵا دەکات”، وتەبێژەکەی دەستەی وەبەرهێنان وای وت.
