هەڵمەتی سەوزکردنی کۆیە دەستیپێکردووە
کۆیە چیمەنی دیالە بەکاردێنێت
964+
دیلان محەمەد جەزا
لە سەرەتای وەرزی پایزەوە هەڵمەتی سەوزکردنی قەزای کۆیە دەستی پێکردوە، جۆرێکی چیمەن لە پارێزگای دیالەوە دەهێنن، بۆ ئەوەی لەگەڵ کەش و هەوای ئەو ناوچەیە بگونجێت.
هێرش غەفوری سەرپەرشتیار لە شارەوانی کۆیە بە 964 وت، “هەڵمەتی سەوزکردنی شۆستەکان بە جۆرێکی فریز دەستی پێکردووە، ئەو جۆرە فریزە لە پارێزگای دیالە دەڕوێندرێت و بە مەتر بۆمان، لە کاتی دانانی نزیکەی 10 رۆژی پێویستە تا جێگای خۆی دەگرێت”.
ئەوەشی وت، دەستکراوە بە رواندنی دار لە شەقامی ئیسکان و هەیبەت سوڵتان و دوو سایدی سلێمانی، لە چوار مانگی کۆتایی ئەمساڵدا نزیکەی 450 دار روێندراون.
لەسەر ئەم بابەتە ئەوەی خستەڕوو، هەڵمەتی سەوزکردنەکە تا کۆتایی ئەمساڵە و دەوەستن تا وەرزی بەهار، پاشان دەست بە سەوزکردنەوە دەکەنەوە.
ئەندازیار شەبەنگ فەرهاد لە شارەوانی کۆیە بە 964 وت، لە کاتی هەڵمەتی سەوزکردندا دارەکان پۆلێن دەکرێن بەسەر شەقامە سەرەکیەکان و جێگاکانی دیکەدا، بە تایبەت ناوچەی هەیبەت سوڵتان بەهۆی رەشەباکەیەوە دەبێت سنەوبەر و واشنتۆن و خورمای لێ بڕوێنرێت.
ئەو ئەندازیارە باسی لەوەشکرد، لە پڕۆسەی سەوزکردنەکەدا سیستمی ئاودێریان بۆ دادەنرێت، بۆئەوەی پێویست بە کارمەند نەکات بۆ ئاودانیان، پرۆسەی سەوزکردنەکان لەسەر ئەرکی شارەوانی کۆیە دەبێت.
پێداچوونەوە: فەهمی نەبی
