تۆمەتبار و ئەو پارەیەی لایبووە - وێنە: پۆلیسی سلێمانی
لە سلێمانی
ژنێک دوای “دزینی” نۆ دەفتەر دۆلار دەستگیر کرا
964+
پێشەوا محەمەد
پۆلیسی سلێمانی دەستگیرکردنی ژنێکی راگەیاند، کە نۆ دەفتەر دۆلاری لە ئۆتۆمبێلێکدا دزیوە و دواتر بەرەو شاری کەرکوک رایکردووە.
بەوتەی پۆلیسی سلێمانی، دوای ئەوەی سکاڵایان لە لایەن هاوڵاتییەکەوە بۆ دێت، کە نۆ دەفتەر دۆلاری لە ئۆتۆمبێلەکەی لێدزراوە، بەدواداچوون دەکەن و پارەکە لەناو ماڵێکی ناوشاری سلێمانیدا دەدۆزنەوە.
بەپێی راگەیەندراوێکی پۆلیسی سلێمانی، کە ئەمڕۆ شەممە 23.12.2023 بڵاویکردووەتەوە، دوای دۆزینەوەی پارەکە بۆیان دەردەکەوێت ئەو کەسەی دزییەکەی کردووە بەرەو کەرکوک هەڵهاتووە و بە هاوکاری پۆلیسی کەرکوک دەستگیر دەکەن.
تۆمەتبار ناو (ز، م، ع)ـە و تەمەنی 26 ساڵە و “دانی بە تاوانەکەیدا ناوە و بە بڕیاڕی بەڕێز دادوەر و بەپێی مادەی 446 لە یاسای سزادان راگیراوە”.
پۆلیسی سلێمانی دەشڵێت، تۆمەتبار لە چەند نوسینگەیەکی تری نەهێشتنی تاوان و بە تۆمەتی دزیکردن و بەپێی مادەی 446 داواکراو بووە.
مادەی 446 تایبەتە بە تاوانی دزیکردن. سزاکەی زیندانیکردنە بە مەرجێک لە پێنج ساڵ زیاتر نەبێت.
