دەوروبەری بەنداوی ئەڵوەن سەوز دەکرێت

964+

راژان باجەڵان – خانەقین

بە هەڵمەتێکی فراوان لەلایەن هونەرمەندان و چاالاکوانانەوە دەوروبەری بەنداوی ئەڵوەن لە خانەقین سەوز دەکرێت.

بەیانی ئەمڕۆ چوارشەممە 20.12.2023 هەڵمەتەکە دەستیپێکرد و نەمام دەچێندرێت و ئەڵوەن سەوز دەکرێت.

ماجید شالیار هونەرمەندێکی خانەقینە و سەرپەرشتیاری هەڵمەتەکەیە، بە 964ـی وت، سەوزکردنی خانەقین ئەرکی هەمووانە، ئەمڕۆ 125 نەماممان رواندووە و دروستکردنی دارستانێک لە دەوروبەری بەنداوی ئەڵوەن، دەبێتە هۆی ئەوەی شوێنی حەوانەوە هەبێت بۆ خێزانەکان و کەشێکی پاک دەستەبەر بێت لەو ناوچەیە.

ئەندازیار ئەحمەد وەسێن، بەڕێوەبەری بەنداوی ئەڵوەن بە 964ـی وت، ئەرکی پاراستنی دارەکان لە دەوروبەری بەنداوەکە دەگرینە ئەستۆ و ئاوی پێ دەگەیەنین و ناهێڵین دارەکان وشک ببنەوە.

نەمامەکان لە لایەن کۆمەڵەی کوردستانی سەوزەوە، هەروەها رێکخراوی هاوکاری ئەڵمانییەوە دابینکراوە و ئامانج لێی زیاتر سەوزکردنی خانەقینە.

پێداچوونەوە: توانا نەقی