وێنه: راگهیاندنى چاكسازی گشتى
كێ ده‌رمان و پێداویستیان بۆ دابین ده‌كات؟
داواكراوه بنكه‌ى ته‌ندروستى چاكسازییه‌كان له‌سه‌ر وه‌زاره‌تى ته‌ندروستى نه‌مێنن
964+
فه‌رهاد حه‌سه‌ن
داوا ده‌كرێت ئه‌و بنكه و مه‌ڵبه‌نده ته‌ندروستیانه‌ى له چاكسازییه‌كانى هه‌رێم هه‌ن، له‌رووى ئیدارییه‌وه بخرێنه سه‌ر چاكسازییه‌كان و چونكه به‌ڕێوه‌به‌رى گشتی ده‌ڵێت، ده‌رمان و پێداویستیه‌كانیان هه‌ر خۆیان دابینى ده‌كه‌ن.
سه‌باره‌ت به باشتر كردنى دۆخى ته‌ندروستى له چاكسازییه‌كانى هه‌رێمی كوردستان چه‌ند جارێك كۆبوونه‌وه‌ى نێوان چاكسازی كۆمه‌ڵایه‌تى و به‌ڕێوه‌به‌رایه‌تى گشتى ته‌ندروستى ئه‌نجام دراوه، به‌ڵام له‌دوایین كۆبوونه‌وه‌یان داواكراوه بنكه ته‌ندروستییه‌كان له‌سه‌ر وه‌زاره‌تى ته‌ندروستى نه‌مێنن.
بنكەو مەڵبەندى تەندروستی له ته‌واوى بەڕێوەبەرایەتیەكانی چاكسازی گەوران، ژنان و منداڵان لە هەرسێ پارێزگای هەولێر، سلێمانی و دهۆك، هه‌یه.
ئیحسان عه‌بدولڕه‌حمان بابان، به‌ڕێوه‌به‌رى گشتى چاكسازى كۆمه‌ڵایه‌تى به 964ـى وت، بنكه‌ى ته‌ندروستى چاكسازییه‌كان پێویسته له رووى ئیدارییه‌وه سه‌ر به ئه‌وان بن، چونكه ده‌ڵێت “مه‌به‌ستمانه له رووى ئیدارى و به‌ڕێوه‌بردنه‌وه، ئه‌م بنكانه تۆكمه‌تر بكه‌ینه‌وه”.
به‌قسه‌ى به‌ڕێوه‌به‌رى گشتى چاكسازییه‌كان، هەوڵدراوه دەرماڵەی مەترسی بۆ ئەو كارمەندان و پزیشكانەی لەو بنكە و مەڵبەندە ته‌ندروستیانه كارده‌كه‌ن خه‌رج بكرێت.
باس له‌وه‌ش ده‌كات كه بۆ ئه‌م بنكه‌و مه‌ڵبه‌نده ته‌ندروستییانه به‌رده‌وام ده‌رمان و پێداویستییه پزیشكییه‌كان له‌لایه‌ن خۆیانه‌وه دابین كراوه و له‌لایه‌ن وه‌زاره‌تى ته‌ندروستییه‌وه دابین ناكرێ.
