دیمەنی قەزای پێنجوێن - وێنە: 964
بۆ راکێشانی گەشتیارە
ئەمساڵ بۆ خلیسکێنەی سەر سەهۆڵ تا پێنجوێن مەوەستە
964+
پێشەوا محەمەد
دەستەی گەشتوگوزار بەنیازە ئەمساڵ یەکەم فێستیڤاڵی خلیسکێنەی سەر سەهۆڵ لە پێنجوێن رێکبخات و وتەبێژی دەستەکە دەڵێت، ناوچەکە بۆ ئەو فێستیڤاڵە زۆر گونجاوە.
دەستەکە سەردانی پێنجوێنی کردووە و لەگەڵ لایەنە ئیدارییەکان تاوتوێی چۆنیەتی ئەنجامدانی فێستیڤاڵەکەیان کردووە.
ئیبراهیم عەبدولمەجید، وتەبێژی دەستەی گەشتوگوزاری هەرێم بە 964ـی وت، “لەگەڵ لایەنە ئیدارییەکانی پێنجوێن لە ئامادەکاری سازدانی فێستیڤاڵەکەین و ئامانج لێی راکێشانی گەشتیارە”.
وتیشی، “ئەنجامدانی ئەو فێستیڤاڵە لە چوارچێوەی گرنگیدانە بە گەشتوگوزاری زستانە، کە هەرێمی کوردستان بۆ ئەو جۆرە گەشتیارییە زۆر گونجاوە و ناوچە شاخاوییەکانی سەرنجڕاکێشن، بۆیە دەمانەوێت پەرە بە گەشتوگوزاری زستانە بدەین”.
دەستەی گەشتوگوزار پلانێکی هەشت ساڵەی هەیە و تیایدا دەیەوێت پەرە بە 15 جۆری گەشتیاری بدات لە هەرێمی کوردستان.
ساڵی رابردوو شەش ملیۆن گەشتیار هاتبوونە هەرێم و شەش مانگی ئەمساڵیش نزیکەی پێنج ملیۆن گەشتیار هاتبوونە کوردستان، دەستەی گەشتوگوزار چاوی لەوەیە رێژەی گەشتیاری ئەمساڵ هەشت ملیۆن کەس تێبپەڕێنێت.
“وادە و شوێنی ئەنجامدانی فێستیڤاڵەکە لە کاتی خۆیدا رادەگەیەنین”، وتەبێژەکەی دەستەی گەشتوگوزار وای وت.
