بەڕێوەبەرایەتی باخچەکان پۆستەری بە باخێکەوە هەڵواسیوە کە رشاندوویەتی - وێنە: بەڕێوەبەرایەتی باخچەکانی سلێمانی
مەترسیدارە
شارەوانی سلێمانی: لەو باخچانە دووربکەونەوە کە دەرمانیان پێوە دەکرێت
964+
پێشەوا محەمەد
شارەوانیی سلێمانی هۆشداری دەداتە هاوڵاتیان نەچنە ئەو باخچانەوە کە دەرمانیان پێدا رشتوون، چونکە دەڵێت زیانی تەندروستییان پێدەگات.
لەم وەرزەدا بەڕێوەبەرایەتیی باخچەکانی سلێمانی دەرمانی دژە نەخۆشی بە دار و چیمەنی باخچەکاندا دەڕشێنێت.
عەلی حامید، وتەبێژی بەڕێوەبەرایەتی باخچەکانی سلێمانی بە 964ـی راگەیاند، یەک رۆژ بەسە هاوڵاتیان دوای رشاندنەکە نەچنە باخچەکەوە تا دار و چیمەنەکان دەرمانەکە بە تەواوی هەڵدەمژن.
وتیشی، “ئەو دەرمانانەی دەڕشێندرێن کیمیایین، هەندێجار زیان بە بۆری هەناسەی مرۆڤ دەگەیەنن، هەندێکیان حەساسییەت بۆ چاو و هەندێکیشیان بۆ پێست دروست دەکەن، وا باشترە هاوڵاتیان لەو زیانانە خۆیان بەدوور بگرن”.
بەڕێوەبەرایەتی باخچەکان هەر باخچەیەک بڕشێنێت پۆستەرێکی پێوە هەڵدەواسێت و هاوڵاتیان ئاگادار دەکاتەوە، کە ئەو باخە دەرمانی پێوە کراوە و نەچنە ناوییەوە.
لەناو شاری سلێمانی 470 باخچە بوونیان هەیە.
