لە هێرشى سەر گرووپە چەکدارەکانى ئێران هەشت کەس کوژراون

964+

ژووری هەواڵ

رووانگەی سووری بۆ مافەکانی مرۆڤ رایگەیاند، لە هێرشەکانى ئەمریکا بۆ سەر گروپە چەکدارەکانى سەر بە ئێران لە سووریا، هەشت چەکدار کوژراون.

ئەمڕۆ دووشەممە 13.11.2023، هێزەکانى ئەمریکا، دوو بنکەى سەربازیى سوپاى پاسداران و گرووپەکانى سەر بە کۆمارى ئیسلامى ئێرانیان لە شارەکانی ئەلبوکەمال و مەیادین، کردە ئامانج.

رووانگەی سووری بۆ مافەکانی مرۆڤ بڵاویکردەوە، لە هێرشانەدا هەشت چەکداری لایەنگری ئێران کوژراون.

لوید ئۆستن، وەزیری بەرگریی ئەمریکا رایگەیاند، “هێرشەکان دامەزراوەیەکی مەشق و حەشارگەیەکی چەک و تەقەمەنیان لە نزیک شارەکانی ئەلبوکەمال و مەیادین کردووەتە ئامانج”.

وتیشى، “ئەو هێرشەیان لە کاردانەوەى هێرشەکانى سەر هێزەکانى ئەمریکا لە عێراق و سووریا، ئەنجامداوە”.

سوپای ئەمریکا: هێرشمان کردە سەر سوپای پاسداران

لە ماوەی سێ هەفتەی رابردوودا ئەمە سێیەم هێرشی فڕۆکەکانی ئەمریکایە لەم ناوچەیە، پێنجشەممەی رابردوو پنتاگۆن رایگەیاند لە 17ی ئۆکتۆبەرەوە 46 هێرش کراوەتە سەر سوپای ئەمریکا لە عێراق و سوریا و 56 سەربازیان بریندار بووە.