فڕۆکەیەکی جەنگی ئەمریکا. وێنە: ئاژانسی ئەنادۆڵ.
دامەزراوەی راهێنان بووە
سوپای ئەمریکا: هێرشمان کردە سەر سوپای پاسداران
964+
ژووری هەواڵ
درەنگانی شەوی رابردوو بە فڕۆکە هێرش کراوەتە سەر چەند ئامانجێک لە خۆرهەڵاتی سوریا، سوپای ئەمریکا دەڵێت ئێمە بووین و چەند ئامانجێکی سەر بە سوپای پاسدارانمان پێکاوە.
وەزارەتی بەرگری ئەمریکا رایگەیاند هێرشەکان بە فەرمانی راستەوخۆی جۆ بایدنی سەرۆکی ئەمریکا بوون ”دامەزراوەیەکی راهێنان و ماڵێک لە نزیک شاری بوکەمال و مەیادین یەک دوای یەک کراونەتە ئامانج”.
بە قسەی لوید ئۆستن وەزیری بەرگری ئەمریکا هەردوو شوێنەکە ”سوپای پاسدارانی ئێرانی و هێزەکانی سەر بە ئێران بەکاریان دەهێنان”.
پنتاگۆن دەڵێت ئەمەی کردوویانە وەڵام بووە بۆ ئەو هێرشانەی لە عێراق و سوریا دەکرێتە سەر هێزەکانیان.
لەماوەی سێ هەفتەی رابردوودا ئەمە سێیەم هێرشی فڕۆکەکانی ئەمریکایە لەم ناوچەیە، پێنجشەممەی رابردوو پنتاگۆن رایگەیاند لە 17ی ئۆکتۆبەرەوە 46 هێرش کراوەتە سەر سوپای ئەمریکا لە عێراق و سوریا و 56 سەربازیان بریندار بووە.
