دیمهنێكی تاڤگه‌ى گه‌لى عه‌لى به‌گ ... وێنه: دهستهى گهشتوگوزار
سروشتى تاڤگه‌كه وه‌ك خۆى ده‌مێنێته‌وه
گەورەترین پڕۆژەی گەشتیاری لە گەلی عه‌لى به‌گ دروست ده‌كرێت
964+
فه‌رهاد حه‌سه‌ن
به پێی پلانێكی حكومه‌تى هه‌رێم، پڕۆژه‌یه‌كی گه‌شتیاری گرنگ له سنوورى ئیداره‌ى سۆران دروست ده‌كرێت، گه‌شتوگوزارى ئه‌و ئیداره‌یه‌ش پشتڕاستی ده‌كاته‌وه ئه‌و پڕۆژه‌یه له قۆناغى ماسته‌رپلاندایه.
پڕۆژه‌كه گه‌شتیارییه و له تاڤگه‌ى گه‌لى عه‌لى به‌گه‌وه درێژ ده‌بێته‌وه تا هاوینه‌هه‌واری بێخاڵ و له‌وێشه‌وه به چیاى باپشتیان ده‌به‌سترێته‌وه.
فەیسه‌ڵ سادق بەڕێوەبەری گشتیی گەشتوگوزاری سۆران، بۆ 964 ئاشكراى كرد ئه‌و پڕۆژه گه‌وره و ستراتیژییه هه‌یه و به چاودێریی راسته‌وخۆى سه‌رۆكى حكومه‌ت كارى له‌سه‌ر كراوه.
وتیشی “ئێستا پڕۆژه‌كه له قۆناغى ماسته‌رپلاندایه و دواتریش به فه‌رمى راده‌گه‌یه‌ندرێت”.
هه‌رچه‌نده به‌ڕێوه‌به‌رى گشتیى گه‌شتوگوزارى سۆران باسی ورده‌كارى و پێكهاته‌ى پڕۆژه‌كه‌ى نه‌كرد، به‌ڵام 964 زانیویه‌تى پڕۆژه‌كه پێكدێت له دروستكردنى ته‌له‌فریك و هۆتێل و مۆتێل و زیادكردنى تاڤگه‌ى جیاجیا له‌و ناوچه‌یه و گلدانه‌وه‌ى ئاو بۆ یارییه سه‌ركێشییه وه‌رزشییه‌كان و دروستكردنى رێڕه‌وى شاخه‌وانى.
فه‌یسه‌ڵ سادق دووپاتیكرده‌وه، به‌هۆى ئه‌م پڕۆژه‌یه‌وه هیچ گۆڕانكارییه‌ك به‌سه‌ر سروشتى تاڤگه‌ى گه‌لى عه‌لى به‌گدا نایەت و وه‌ك خۆى ده‌مێنێته‌وه.
ئه‌وه‌شی ره‌تكرده‌وه، هیچ پڕۆژه‌یه‌كی هاوشێوه بۆ گه‌لى بێخاڵ هه‌بێت و وتیشی “ئه‌وه‌ى هه‌یه ته‌نیا ئه‌و پڕۆژه گه‌شتیارییه‌یه”.
تابلۆی مه‌ترسییه‌كانى مه‌له‌كردن له گه‌لى عه‌لى به‌گ چه‌قێندران
