ئەمساڵ پێباز لە رووی کشتوکاڵەوە حەشر دەکات

توانا نەقی

ناحیەی پێباز “باوەنور” ئەمساڵ لە رووی بەرووبوومی کشتوکاڵییەوە بەرووبوومی جیاواز و زۆری هەبوو کە لە کاتی رنینیەوە رۆژانە هەلی کار بۆ دەیان کەس دەڕەخسێنێت.

دەشتەکانی پێباز بە دەیمەکار و ئاوییەوە کشتوکاڵی تیادا دەکرێت بە گەنم و جۆ و پاقلەمەنییەکان و شووتی دەچێندرێت.

پشدەر حسێن لێپرسراوی بەشی کشتوکاڵی پێباز بە 964ـی وت، ناحیەی پێباز بەشی زۆری بەرووبومی کشتوکاڵی گەرمیان دابین دەکات و جۆرە جیاوازەکانی بەرهەمی لێ بەرهەمدەهێنرێت.

وتیشی، لە کاتی رنینەوەی بەرهەم رۆژانە 150 – 200 کرێکار کاردەکەن و هەلی کاری باش دەڕەخسێنێت.

زەوییە دەێمەکارەکان گەنم و جۆی بە رێژەیەکی زۆر لێ بەرهەم دێت و ئەوەشی کە بە ئاوی کانیا و ناعورەکان دەکرێت پاقلەمەنییەکان و شوتی لێ بەرهەم دێت کە شوتی ئەمساڵی پێباز بۆ تام خۆشی و جوانی بە وتەی کڕیارەکان داویەتی بەلای شوتی پێنجوێندا، پشدەر حسێن وای وت.

لە رووی هاوکاری جوتیارەوە لەو سنوورە لێپرسراوی کشتوکاڵی پێباز دەڵێت: ئەوان تا بتوانن هاوکارییان دەکەن و لە دابینکردنی ئاوی ناعورەکان، بەڵام ناتوانن وەک پێویست پەین و کیمیایان بۆ دابین بکەن کە ئەوە ئەرکی حکومەتە.

ناحیەی پێباز سەر بە قەزای کەلاری ناوەندی ئیدارەی گەرمیانە و ژمارەی دانیشتوانەکەی زیاتر لە 10 هەزار کەسە.